Нодирбек Абдусатторов: "Магнус ўйнашини эшитишим билан иштирок этишга рози бўлдим"

Швециядаги турнирни ғалаба билан бошлаган ҳамюртимиз Нодирбек Абдусатторов баҳсдан кейинги интервьюсида ўз стратегияси ва асосий мақсади ҳақида сўзлаб берди.

"Рақибимнинг ўйинларини ўрганиб чиқиб, у асосан э4 юришини танлашини ва бу борада тайёргарлиги кучли эканини билдим. Шунинг учун унга сюрприз қилиш мақсадида Каро-Канн ҳимоясини танладим. Бу у учун кутилмаган бўлди"

Ўйин давомида Абдусатторов рақибнинг устунлигини йўққа чиқариш учун сипоҳларни алмаштириш тактикасини қўллаган. Якунда рақиб вақт танқислигида (сейтнот) қўпол хатога йўл қўйди ва Нодирбек бундан унумли фойдаланиб, ғалабага эришди.

Шунингдек, Нодирбек сўнгги вақтларда Лондон, Вейк-ан-Зее ва Прага турнирларида кетма-кет чемпионликни қўлга киритди. Унинг айтишича, асосий сир барқарорликда.

"Мен шунчаки максимал даражада барқарор ўйнашга ҳаракат қиляпман. Бу йил Гранд Чесс Тоуръда қатнашмаётганим сабабли, бошқа нуфузли турнирларда иштирок этишим керак эди"

Интервюнинг энг қизиқ нуқтаси Нодирбекнинг ушбу турнирга нега келгани ҳақидаги савол бўлди:

"Мен бу ерга айнан Магнус борлиги учун келишга қарор қилдим. Унинг ўйнашини эшитишим билан иштирок этишга дарҳол рози бўлдим."

Турнирнинг 3-турида Нодирбек жаҳоннинг 1-рақамли шахматчиси Магнус Карлсенга қарши дона суради. Бу баҳсда Нодирбек қора доналарда ўйнайди.

"Қора доналарда ўйнашнинг ҳам ўзига хос плюслари бор менда ортиқча босим бўлмайди. Кўрамиз, бу қандай натижа берар экан", - деди ўзбекистонлик шахматчи.