Неймарнинг жароҳати кутилгандан жиддийроқ бўлиши мумкин
- 22-май, 03:09
- Bilolbek Imomov
- 0
- Футбол
“Сантос” ҳужумчиси Неймарнинг жароҳати атрофидаги вазият хавотир уйғотмоқда.
Аввалроқ Бразилия терма жамоасининг Жаҳон чемпионати учун қайдномасига киритилган 34 ёшли футболчи болдир мушагидан жароҳат олгани ва 5-10 кун майдондан четда қолиши хабар қилинган эди.
Бироқ ESPN маълумотига кўра, Бразилия футбол конфедерациясида тикланиш жараёни бундан ҳам узоқроқ давом этиши мумкин деб ҳисоблашмоқда. Ташкилот Неймарнинг жисмоний ҳолатини баҳолаш учун 27 май куни терма жамоа йиғини бошланишини кутмоқчи.
“Сантос” эса ҳали ҳам футболчининг жароҳати жиддий эмаслигини таъкидламоқда. Клуб ҳатто Неймар 26 май куни “Депортиво Куэнка”га қарши Жанубий Америка Кубоги баҳсида майдонга тушиши мумкинлигини ҳам истисно қилмаган.
Шу билан бирга, вазиятдан хабардор манбалар терма жамоа вакилларига тикланиш жараёни аввал ўйланганидан мураккаброқ кечаётганини билдирган.
Айни пайтда Неймарнинг 1 ва 6 июнь кунлари Панама ҳамда Мисрга қарши ўртоқлик учрашувларида иштирок этиши эҳтимоли жуда паст баҳоланмоқда.