"Насаф" сўнгги турда мухлисларини хурсанд қилди

Бугун Элит Осиё Чемпионлар лигасининг сўнгги тур баҳсларига старт берилди.

Турнирда юртимиз шарафини ҳимоя қилаётган Қаршининг "Насаф" жамоаси Бирлашган Араб Амирликларининг "Шаржа" клуби меҳмони бўлди. Учрашувнинг 30-дақиқасида Бобир Абдухолиқов ҳисобни очди ва "аждарлар"ни олдинга олиб чиқди. 80-дақиқада рақиблар пенальтидан мувозанатни тиклади. Орадан 7 дақиқа ўтиб Диёрбек Абдуназаров супер гол уриб яна "Насаф"ни ҳисобда олдинга олиб чиқди. Ушбу ҳисоб ўйин сўнгига қадар ўзгармади ва қаршиликлар ғалаба қозониб, турнирни 4 очко билан якунлади. Жамоа мусобақадаги дастлабки 6 ўйинда мағлуб бўлган бўлса, охирги икки ўйинда 1 дуранг ва 1 ғалабани қайд этди.