МЮ голли вазиятлардан фойдаланиш борасида жуда ёмон кўрсатгич қайд этмоқда

"Манчестер Юнайтед" мавсум бошида вазиятларни голга айлантириш борасида жиддий қийинчиликка дуч келмоқда. Эрик тен Хаг шогирдлари кеча бўлиб ўтган АПЛ доирасидаги "Кристал Пэлас"га қарши ўйинда (0:0) 3 очко ололмади, гарчи уларда гол уриш учун имкониятлар етарли бўлган бўлса ҳам.

WhoScored маълумотларига кўра, "Манчестер Юнайтед" ҳозирда топ-5 лигадаги барча жамоалар орасида голли вазиятлар яратиш бўйича учинчи ўринда. Бироқ "қизил иблислар" жорий мавсум ҳозирча бор-йўғи беш марта рақиб дарвозасини ишғол этишга муваффақ бўлди холос. Бу борада манкунианликлардан фақатгина “Саутгемптон” ва “Кальяри” ёмонроқ кўрсатгичга эга.

“Манчестер Юнайтед” ортда қолган беш тур якунлари бўйича 7 очко жамғарган ҳолда АПЛ мусобақа жадвалида 11-ўринда бормоқда.