"Мухлисларнинг эркатойи" эмасман!

Британиялик Мозес Итаума ва Хорватия вакили Филип Хргович ўртасидаги баҳс аввалига унчалик катта аҳамиятга эга эмасди.

Дастлаб бу тўқнашув чемпионлик учун эмас, оддий рейтинг жанги сифатида режалаштирилганди. Бироқ кейин вазият кескин ўзгарди — IBF нинг вакант камари айнан шу қарама-қаршиликка қўйиладиган бўлди. Бу қарор барча шартлар келишилганидан сўнг қабул қилинди.

Яна бир муҳим жиҳат — Фрэнк Санчес ўз навбатини бошқага беришга рози бўлганидир. У янги чемпион аниқлангандан сўнг у билан рингга чиқишни танлади. Шу орада эса Хргович оммавий баёнотларида Итауманинг чемпионликка йўли ўзиникига нисбатан анча енгил кечаётгани, унга "мухлисларнинг эркатойи" сифатида алоҳида шароит яратилаётганини таъкидлай бошлади.

"Менга шунчаки бундай муносабатда бўлишмаяпти. Менда промоутерларни, хусусан Queensberry жамоасини ишонтирган бир нарса бор. Улар бугунги ютуқларим учун эмас, келажакда нима қила олишимга ишониб пул тикишяпти. Ҳар бир жангим билан уларнинг ишончини оқлаётганимни ҳис қиляпман.

Хргович — фаолиятимдаги энг кучли боксчилардан бири бўлади, буни инкор қилмайман. Бироқ мен ҳар бир рақибимни биринчи ёки иккинчи раундда нокаут қилганман. Масалан, Жермейн Франклин — у фаолияти давомида ҳатто нокдаун ҳам бўлмаганди. Мен эса уни беш раундда бутунлай синдирдим.

Мени “мухлисларнинг эркатойи” дейишганда, гўё менга алоҳида имтиёзлар берилгандек туюлади. Лекин боксда ҳеч нарсани тайёр ҳолда берилмаган, барчасига эришиш учун меҳнат қилганман", – деди Мозес.

Эслатиб ўтамиз, Итаума ва Хргович жанги 29 август куни Лондонда ўтказилади.