"Мураббийимиз терма жамоани қаёққа тайёрлаётганини тушунишимиз керак, бу жаҳон чемпионати-ку!" - таниқли мутахассис МТЖнинг ўйинини таҳлил қилди

Ўзбекистон миллий терма жамоамиз "FIFA Series" доирасида ташкил этилган халқаро турнирда ғолиб чиқди. Ҳал қилувчи беллашувда "Бунёдкор" стадионида Венесуэла термасига қарши бўлиб ўтган ўйинда асосий вақтда ҳисоб очилмади ва пенальтилар сериясида 5:4 ҳисобида Фабио Каннаваро шогирдлари ғалаба қозонди ва ушбу турнир ғолибига айландилар.

Таниқли мутахассисларимиздан бири Ислом Аҳмедов миллий терма жамоамизнинг Венесуэлага қарши ўтказилган ўйинини таҳлил қилиб берди.

"Аввало, барчани  "FIFA Series"да Габон ва Венесуэла жамоаларини мағлуб этганимиз билан табриклайман.

Венесуэла жамоасига қарши ўйинга келсак - ўйинни томоша қилиб, айтишим мумкинки, мураббийимиз майдонда жамоа ўйинидан нимани кутаётгани аниқ кўриниб турибди.
 
1. Рақиб ҳужумга ўта бошлаганда - фаол прессинг, рақибни хато қилишга мажбур қилиш! Агар рақиб тўпни назоратга олса - позицион ҳимояга ўтиш, тўпни олиб қўйгач, тезкор ҳужум уюштириш.
2. Жамоамиз тўпга эгалик қилганда - қанот ўйинчиларидан фойдаланиб, тўпни олдинга кўпроқ вертикал узатишни қўллаш ва учинчи зонада индивидуал ҳаракатлар эвазига ҳужумкор ҳаракатларини якунлаш. Шундай ўйнаш бутун ўйин давомида давом этиши керак!
Бундай футбол ўйнаш жуда қийин, аммо мураббийимиз жамоани қаёққа тайёрлаётганини тушунишимиз керак, бу жаҳон чемпионати-ку!

Мураббий ўзининг сўнгги интервьюларидан бирида Суперлига жамоаларининг чемпионат даражасидан хавотирланаётганини айтган эди.  Венесуэла билан ўйинни томоша қилгач, у ҳар бир футболчи ва жамоанинг умумий ўйинида нимани кўришни истаётганини кўрдим. Унинг хавотирини жуда яхши тушунаман.

Футболчилар ушбу ўйинда ўз мураббийларини яхши тушунишини намойиш этдилар ва бутун ўйин давомида буни амалга оширишга ҳаракат қилдилар, баъзида эса бу жуда яхши чиқди ва буни барчамиз кўрдик.

Ушбу турнирдан сўнг ҳамма ўз клубларига қайтади ва албатта, мураббийда савол туғилади - терма жамоага номзод футболчилар ўз клубларида ушбу режимда ва ушбу талаблар асосида ишлашни давом эттирадими?", - дейди Аҳмедов.