Мундиалда танқидга учраган Танташев хушхабар олди
- 25-июл, 14:00
- Zohir Toshxo’jayev
- 1
- Футбол
Ўзбекистонлик футбол ҳаками Ильгиз Танташев Халқаро футбол тарихи ва статистикаси федерацияси (IFFHS) талқинига кўра 2026 йилги жаҳон чемпионатининг энг яхши ўн нафар ҳаками қаторига кирди, дея хабар бермоқда IFFHS расмий сайти.
Турнир якунларига кўра, Ўзбекистон вакили рейтингда ўнинчи ўринни эгаллади. Рўйхатни шакллантиришда ҳакамнинг неча марта ўйинга тайинлангани, қай даражадаги баҳсларни бошқаргани, плей-офф босқичидаги фаолияти ҳамда интизомий кўрсаткичлари инобатга олинган.
Жаҳон чемпионати доирасида Танташев бош ҳакам сифатида учта учрашувни бошқарди. Гуруҳ босқичида у Шотландия — Марокаш ва Жазоир — Австрия ўйинларида ишлади, плей-оффда эса Парагвай — Франция баҳсига тайинланди.
Таъкидлаш жоизки, ўзбекистонлик ҳакамнинг плей-офф учрашувидаги бошқаруви кўплаб муҳокамаларга сабаб бўлди. Чунки Ильгиз Танташев шу куни французларга қарши ўта қўпол ўйнаган парагвайликларга бирорта огоҳлантириш бермади.
IFFHS талқинига кўра, жаҳон чемпионатининг энг яхши ҳаками деб Испания ва Аргентина ўртасидаги финал учрашувини бошқарган словениялик Славко Винчич эътироф этилди. Иккинчи ўринни АҚШ вакили Исмаил Эльфат эгаллаган бўлса, учликни Сальвадордан бўлган Иван Бартон якунлади.
Энг яхши ўнликка, шунингдек, француз Клеман Тюрпен, инглиз Майкл Оливер, португалиялик Жоау Пиньейру, аргентиналик Факундо Тельо, венесуэлалик Хесус Валенсуэла ва иорданиялик Адхам Мохаммад ҳам кирди.
IFFHS талқинига кўра 2026 йили жаҳон чемпионатининг энг яхши 10 ҳаками:
1. Славко Винчич (Словения)
2. Исмаил Эльфат (АҚШ)
3. Иван Бартон (Сальвадор)
4. Клеман Тюрпен (Франция)
5. Майкл Оливер (Англия)
6. Жоау Педру Пиньейру (Португалия)
7. Факундо Тельо (Аргентина)
8. Хесус Валенсуэла (Венесуэла)
9. Адхам Мохаммад (Иордания)
10. Ильгиз Танташев (Ўзбекистон)