Мундиалда Испания дарвозасини қўриқлаган посбон вафот этди

Испания миллий терма жамоаси ва Бильбаонинг “Атлетик” клуби шарафини ҳимоя қилган афсонавий дарвозабони Кармело Седруннинг 95 ёшида вафот этди.

Седрун 14 мавсум давомида “Атлетик” дарвозасини қўриқлаб, басклар клуби тарихидаги энг буюк дарвозабонлардан бири сифатида эътироф этилган. У асосий жамоа сафида жами 404 та ўйинда иштирок этган. Илк учрашувини 1951 йил 15 апрель куни “Севилья”га қарши баҳсда ўтказган.

Фаолияти давомида у Испания чемпионлиги (1955/56), уч марта Испания кубоги (1954/55, 1955/56 ва 1957/58) ҳамда кейинчалик мамлакат Суперкубогининг илк кўриниши ҳисобланган Ева Дуарте кубогини (1950) қўлга киритган.

Айниқса, 1958 йилги Испания кубоги финали клуб тарихида алоҳида ўрин тутади. Ўшанда басклар Европа чемпионлар кубогининг амалдаги соҳиби бўлган “Реал”ни мағлуб этган.

2019 йилга қадар Седрун Испания чемпионатида кетма-кет энг кўп ўйин ўтказиш бўйича клуб рекордига эгалик қилди. У 1952–1957 йиллар оралиғида 132 та кетма-кет учрашувда майдонга тушган. Кейинчалик бу натижани Иньяки Уильямс янгилади.

Кармело Седрун Испания терма жамоасида 1954 йилда дебют қилган ва жами 13 та ўйин ўтказган. Шунингдек, у 1962 йил Чилида бўлиб ўтган жаҳон чемпионатида миллий жамоа дарвозасини дастлабки икки баҳсда қўриқлаган.

Кармело Седруннинг ўғли Андони Седрун ҳам “Атлетик” дарвозабони бўлган. Набираси Маркель ҳам оила анъанасини давом эттиришга уринган, аммо клубнинг асосий таркибидан жой ола билмаган.