Мундиал дебютантлари иштирокидаги ўйинлар зерикарли бўлади?! Каррагерга эътирозларимиз бор

Англия терма жамоасининг собиқ футболчиси Жейми Каррагер 2026 йилги Жаҳон чемпионатида иштирок этадиган айрим жамоаларни танқид қилиб, уларнинг ўйинларини “фақат ақлдан озган одамлар” томоша қилишини айтди.

“Бу Жаҳон чемпионатида албатта, жуда зерикарли ўйинлар бўлади. Соғлом фикрли ҳеч ким Кабо-Верде – Ўзбекистон ёки Иордания – Тунис ўйинини интиқлик билан кутмайди,” — деди Каррагер. Аммо Каррагернинг бу сўзларида жон борми? Футбол бугун глобал спорт тури, янги жамоаларнинг чиқиши эса миллионлаб мухлисларда қизиқиш уйғотмаяптими? Шу ўринда савол туғилади: “Футбол ватани” саналган Англия ўзи қандай натижалар кўрсатмоқда? Қуйида шу саволларга жавоб топасиз: 

Жаҳон чемпионатининг дебютантлари: Ўзбекистон, Кабо-Верде, Иордания терма жамоаларининг юксалиши ва футбол жамоатчилигининг уларга бўлган қизиқиши

Ўзбек футболи сўнгги йилларда сезиларли даражада ривожланиб, халқаро миқёсда танилиб бормоқда. Дастлаб, Элдор Шомуродовнинг Италия А Сериясининг “Женоа”, “Рома”, “Специя” ва “Кальяри” клубларида тўп сургани хорижлик мухлисларда Ўзбекистон футболига нисбатан эътибор уйғотди. Шундан сўнг Абдуқодир Ҳусановнинг “Манчестер Сити”да пайдо бўлиши эса бу қизиқишни янада кучайтирди — энди ўзбек футболчилари турли минтақаларда ўз мухлисларига эга бўла бошлади.

Бу йилларда Ўзбекистон терма жамоалари бир қатор йирик мусобақаларда эътиборга молик натижаларни қайд этди:

ФИФА рейтингида ўсиш: 2021 йилда 85-ўринда бўлган Ўзбекистон 2025-йилда 54-ўринга кўтарилди.


2024 йил Осиё Кубоги: чорак финалгача етиб борди.


2022 йил U-23 Осиё чемпионати: финалчи бўлди.


Ўзбекистон U-17 терма жамоаси кичик мундиал — ФИФА U-17 Жаҳон чемпионатига йўлланма олди.

2024 йил Париж Олимпиадаси: Ўзбекистон илк бор футбол бўйича иштирок этди.

Энг эътиборли жиҳатлардан бири — Ўзбекистон U-17 терма жамоасининг 2023 йилда ФИФА U-17 Жаҳон чемпионатида Англия U-17 жамоасини 2:1 ҳисобида мағлуб этгани бўлди. Бу ўйин ёш футболчиларимизнинг техник маҳорати ва руҳий тайёргарлигини намоён этди.


 

Кабо-Верде:

Африканинг кичик орол давлати Кабо-Верде сўнгги йилларда футбол орқали ўз номини қитъа миқёсида танита олди. Африканинг ғарбида жойлашган бу кичик орол давлатининг майдони атиги 4 000 кв,км, аҳолиси эса бор-йўғи 583 минг кишини ташкил этади. Жаҳон чемпионати тарихида бундай кичик ҳудудга эга мамлакат ҳали иштирок этмаган.

ФИФА рейтинги (2025): 65-ўрин атрофида жойлашган.

Африка Миллатлар Кубоги (2024): чорак финал босқичига чиқди
.
Европа клубларида: Кабо-Верде футболчилари Португалия, Франция ва Нидерландия лигаларида мунтазам тўп суришмоқда (масалан, Гарри Родригес — “Олимпиакос”, Райян Мендес — “Ан-Наср”).

Тарихий натижа: 2013 йилда Африка Кубогида илк бор иштирок этиб, чорак финалгача етиб борган.

Шу натижалар Кабо-Верденинг футбол тизими чекланган ресурсларга қарамай, ўсаётганини кўрсатади.

Иордания:

Иордания — Ғарбий Осиёда жойлашган, аҳолиси 11 миллионга яқин бўлган мамлакат бўлиб, сўнгги йилларда футбол бу ерда энг оммабоп спорт турига айланган. Мамлакат Осиё миқёсида сезиларли юксалишга эришмоқда.


ФИФА рейтинги (2025): 62-ўрин;

2023 йилги Осиё Кубогда тарихий ютуққа эришиб, финалгача етиб борди ва Қатар билан 1:3 ҳисобида мағлуб бўлди. Шунингдек, жамоа ушбу турнирнинг ярим финалида  Осиёнинг гранди Жанубий Кореяни енгиб, ҳамманинг эътиборини тортди. 

U-23 Осиё чемпионати (2024): Чорак финалгача етиб борди: 

Легионер футболчилар: Иордания футболчилари Саудия Арабистони, Қатар ва БАА клубларида мунтазам тўп суришади:

ФИФА ва ОФК томонидан сўнгги йилларда Иордания футбол тизимига катта сармоя йўналтирилмоқда. Мамлакат 2018 йилда аёллар футболи бўйича Осиё Кубогига мезбонлик қилган ва янги академиялар тармоғини ривожлантирмоқда.



 

Муҳаммадқодир Рузматов 

Давоми бор...