Муҳаммад Салоҳнинг кейинги манзили – Мадрид!

“Ливерпуль”даги тўққиз йиллик фаолиятидан кейин жамоани тарк этишга қарор қилган ҳужумчи Муҳаммад Салоҳ Мадриднинг “Атлетико” клубига қўшилиши кутилмоқда.

Муҳаммад Салоҳ Мерсисайд клубида шу вақтгача жами 441 та ўйин ўтказиб, 257 та гол урди ва 122 та голли узатмани амалга оширди.

WinWin маълумотига кўра, аввалроқ 33 ёшли футболчи учун асосий даъвогарлар Саудия Арабистони клублари ҳисобланаётган эди, аммо энди “Атлетико” варианти ҳақида маълумотлар пайдо бўлди.

Шу билан бирга, Мадрид клубида бундай трансферни амалга ошириш жуда қийин бўлишини тан олишмоқда.

- Салоҳ — энг юқори даражадаги футболчи ва, албатта, исталган Европа клуби уни ўз таркибига қўшиб олишни истайди. Аммо ҳозирча ҳеч қандай расмий қадамлар ташланмади.

Асосий муаммо — унинг юқори маоши, бу эса мадридликларнинг ҳозирги молиявий тузилмасига мос келмайди, - деди “Атлетико”га яқин манба.

Ҳозирда Салоҳ йилига 20 миллион фунтдан ортиқ маош олади ва айнан молиявий талаблар унинг Испания клубига ўтишидаги асосий тўсиқ бўлиши мумкин.