Мирко Еличич: "Рақибга гап йўқ"

"Локомотив" Ўзбекистон Кубогини мағлубият билан бошлади. Жамоа сафарда про лига вакили - "Лочин"га 1:0 ҳисобида имкониятни бой берди. Ўйиндан кейин "Локомотив" устози Мирко Еличич ўз фикрлари билан ўртоқлашди.

- Рақибга гап йўқ. Улар жисмонан яхши футбол намойиш қилишди. Шуни ҳисобга олган ҳолда курашларга тайёр тургандик. Мағлуб бўлиш аламли. Демак, руҳан ушбу ўйинга тайёр бўлмаганмиз. Иккинчи бўлимда анчагина қўшгандик, бироқ бу ҳам етмади. Бизнинг ўйин сифатимиз эса ўзимиз истагандек бўлмади.

- "Лочин"ни ҳимояси ҳақида фикрларингиз. Рақиб жамоа қандай ҳимояланди?

- Яхши, ёмон эмас. Уларда тезлик бор, яхши курашишди. Бизда кўплаб вазиятлар бўлди, бироқ улар гол ўтказишмади. Бир вазиятда фол берилиши керак эди, лекин бу ҳам бўлмади. Жисмонан кучли футболчилар яхши курашишди.

- "Локомотив"нинг ушбу мавсумда урган голларидан ўтказган голлари кўпроқ. Бунинг сабаби нимада?

- Биз жамоавий ўйин кўрсатяпмиз. Рақибнинг барча ҳаракатларини ҳам ўқиб бўлмайди. Ўтказиб юборилган голларни кўриш осон. Бироқ ўйиннинг ўзидан келиб чиқадиган бўлсак, кўплаб қирраларимиз очилмоқда. Бизда таркибдаги барча футболчилар ўз нуқталарига жавоб беришади. Ўтказиб юборган голларимизнинг ярми стандартдан. Бу яхши эмас. Бу томонни ҳам яхшилашга ҳаракат қиляпмиз. Бунинг учун кўпроқ меҳнат қилиш керак.

- Ўтган ўйиндан кейинги матбуот анжуманида кубок ўйинлари орқали жамоани халқаро майдонга қайтаришни истаётганингизни айтгандингиз. "Локомотив"нинг кубокдаги мақсади қандай? Жамоанинг кубок орқали ОЧЛга чиқишига ишонасизми?

- Бу мусобақада барчанинг имконияти бор, ҳаттоки "Лочин"да ҳам. Кубокда исталган рақиб тушиб қолиши мумкин. Энг муҳими шу уч ўйин. Айрим жамоалар бу баҳслардан кейин чарчоқ аломатларини ҳис қилиши ва хоҳлаган натижалар қайд этилиши мумкин. Бу эса қилинган меҳнатларни йўққа чиқаради.