Мирко Еличич: "Менимча, бизда ҳали имкониятлар бор"

Ўзбекистон Кубоги доирасидаги "Локомотив" - "Динамо" (2:2) ўртасидаги беллашувдан кейин мезбонлар бош мураббийи Мирко Еличи матбуот анжуманида фикрлар билдирди.

- Жонажон стадионимизга қайтиш ёқимли. Узоқ йиллар давомида бу ерда чиройли ўйинлар ўтказганмиз. Футболчилар ҳам шуни ҳис қилиб туришди. Ўз навбатида бугун мухлислик учун келган мухлисларга ҳам раҳмат айтаман. Бу ҳам жамоага куч беради. Олдинданоқ ўйин қийин бўлишини билардик. Бундай ҳисобдаги дуранг бўлган ўйинларнинг катта қисми, асосан, очиқ ва ҳужумкор бўлади ва бугун ҳам шундай ўйинни кўрдик.

- "Динамо"нинг "қотили" Темурхўжа Абдуҳолиқов бугун нега ўйнамади?

- Унда кичик жароҳат бор. Тўлиқлигича тузалмагунча уни хавф остига қўя олмаймиз. "Лочин"га қарши ўйин олдидан машғулотда жароҳат олди ва шу сабабли ўша ўйинда умуман ўйнамади. Бундай жароҳатларни тезда даволаб бўлмайди, бироз вақт керак.

- "Локомотив" 1-турда мағлуб бўлди ва мана энди дуранг ўйнади. Жамоа кубокда узоқроққа боришни истайдими?

- Исталган жамоа узоқроққа боришни истаса керак. Биз ҳам шуни ўйлаяпмиз. "Лочин"га қарши ўйинда ўз сифатимизни кўрсата олмадик. Балки бироз бўшашгандирмиз. Бу жамоа жуда зўр ўйин намойиш қилди. Умуман олганда, Про лиганинг барча жамоалари кубокда яхши ўйин кўрсатмоқда. Уларга қарши осон ўйиннинг ўзи бўлаётгани йўқ. Бугунги очко етарли бўладими, йўқми, билмайман. Менимча, ҳали бизда имкониятлар бор.