Миржалол Қосимов: "Бенземага алоҳида бир футболчини бириктириб қўйиш ниятимиз йўқ"

Эртага Осиё чемпионлар лигаси 5-туридан ўрин олган ОКМК - "Ал-Иттиҳод" учрашуви бўлиб ўтади. Беллашув 21:00 да бошланади. 

Ушбу баҳс олдидан олмалиқликлар бош мураббийи Миржалол Қосимов матбуот анжуманида қатнашди ва ўз фикрлари билан ўртоқлашди. 

"Ассалому алайкум! Эртага биз учун, Олмалиқ шаҳри учун тарихий кун. Жуда катта жамоага қарши майдонга чиқамиз ва бу бизга мотивация беради. Ҳозир бизда босим йўқ. Сабаби, 4 та ўйинда очко ишлай олмадик ва гуруҳдан чиқиш масаласини қўлдан бой бердик. 

Эртага бизни қизиқарли учрашув кутмоқда ва бунда яна бир бор ўз кучимизни синаб олишга имконимиз бўлади. 

Жароҳатлар ҳамон бизни қийнамоқда. Рубен Санчес, Шоҳрух Гадоев тикланишга улгурмади. Акром Комилов қизил карточка сабаб ўйинни ўтказиб юборади. Худо хоҳласа, эртанги баҳсда мухлислар олдида юзимиз ёруғ бўлади, деб умид қиламан.

Тақвим жуда ҳам зич. Чемпионат, Ўзбекистон кубоги ва ундан ташқари ОЧЛ ҳам биз учун оғирлик қилди. Жароҳатлар ҳам яхшигина салбий таъсир кўрсатди. 

Меҳнатимиз орқали катта юлдузларни юртимизга келишига сабабчи бўлдик. Эртага шу юлдузларни мағлуб этишга ҳам ҳаракат қиламиз. 

Бенземага алоҳида бир футболчини бириктириб қўйиш ниятимиз йўқ. У юқори даражадаги ўйинчи, аммо биз Бенземага эмас, "Ал-Иттиҳод"га қарши майдонга тушамиз", - деди мутахассис.