"Металлург" яна бир легионер билан боғлиқ муаммони ҳал қилди

Бу йилдан эътиборан про лигада иштирок этиши ойдинлашган "Металлург" клуби таркибини кучайтириш билан бир қаторда аввалги қарздорлик масалаларни ҳам ҳал қилишига тўғри келмоқда.

Жумладан, яқинда клубнинг сербиялик собиқ легионери Иван Йосович олдидаги қарздорлик ижобий ҳал қилинганди. Лекин бу ҳали ҳаммаси эмасди. Жамоанинг яна бир собиқ легионери Марко Миличкович билан ҳам муаммоси бор эди.

Клуб матбуот хизматининг маълум қилишича, Бекободнинг "Металлург" клуби собиқ футболчиси Марко Миличкович билан боғлиқ вазиятни ижобий ҳал қилди. 

Черногориялик футболчи молиявий муаммолар сабабли ОФКга арз қилган эди. Қайта ташкил қилинган "Металлург" ПФК раҳбарияти мазкур масалани синчковлик билан ўрганиб чиқишди ҳамда ҳал қилишни уддалашди.

Натижада, энди "Металлург" клубининг лицензиялаш билан боғлиқ ҳеч қандай чеклов ёки муаммолари мавжуд эмас. Бу борада 5 март санасида Ўзбекистон Профессионал футбол лигасига ОФКдан хат юборилган.

Ўз навбатида футболчининг агенти Никола Тадич ўйинчи ва "Металлург" клуби ўртасидаги барча муаммолар бартараф этилгани тўғрисида хат юборди.

Шунингдек, агент мазкур вазият ҳал этилишида жонбозлик кўрсатган "Металлург" ПФК бош директори Улуғбек Мирзаевдан миннатдор эканлигини таъкидлаб ўтди. Никола тажрибали мутахассис тўлиқлигича алоқани сақлаб тургани, профессионал тарзда масалаларни ҳал этишда амалий ёрдам кўрсатганига урғу бериб ўтди.