Мессини алиштириб балога қолдим!

Машҳур аргентиналик мураббий Маурисио Почеттино “Пари Сен-Женмен”да ишлаган даврида ҳамюрти Лионель Месси билан юзага келган вазият аслида қандай бўлганини очиқлади.

Ҳозир АҚШ миллий терма жамоаси бош мураббийи бўлиб ишлаётган Маурисио Почеттино ПСЖни бошқарган учрашувлардан бирида Линоель Мессини захирага олгани кенг муҳокама ва мунозаларга сабаб бўлган эди.

- ПСЖ каби клубда қабул қилган ҳар қандай қароринг ташқи таъсирга эга бўлади. Эслайсизми, бир сафар мен Лео Мессини алмаштиргандим. Буни шифокор унинг тиззасида муаммо борлигини айтгани учун қилгандим.

Шундан кейин баъзилар: “Гвардиола ҳеч қачон Леони алмаштирмаган бўларди, Почеттино Месси ҳар доим майдонда қолиши кераклигини тушунмайди”, деб гапира бошлашди.

Шунга қарамай, менинг Лионель билан ҳеч қачон муаммоларим бўлмаган, - деди Почеттино TheOverlap подкастида.

Почеттино ПСЖда 2021 йил январидан 2022 йил июлигача ишлаган. У бошқарувида жамоа 84 ўйин ўтказиб, 56 ғалаба, 13 дуранг ва 15 мағлубият қайд этган.

Месси ПСЖда икки йил, яъни 2021 йилдан 2023 йилгача тўп сурган. У 75 учрашувда 32 гол уриб, 35 голли пас берган.