Месси Иорданияга қарши баҳсни захирадан бошлаши кутилмоқда

ESPN хабарига кўра, Аргентина терма жамоаси сардори Лионель Месси Жаҳон чемпионати гуруҳ босқичи 3-туридан ўрин олган Иорданияга қарши учрашувни захира ўриндиғида бошлайди.
⠀
Аргентина терма жамоаси 28 июнь куни Тошкент вақти билан соат 05:00'да Иорданияга қарши майдонга тушади. Жамоа аввалги икки турда Жазоирни 3:0 ва Австрияни 2:0 ҳисобида мағлуб этди. Ушбу бешта голнинг барчасига Месси муаллифлик қилди.
⠀
"J" гуруҳида пешқадам бўлиб турган Аргентина бош мураббийи Лионель Скалони бу баҳсда аввалроқ камроқ ўйин вақтига эга бўлган футболчиларга имконият беришни режалаштирмоқда. Шу сабабли, Месси учрашувни захирадан бошлаши кутилмоқда.
⠀
Манбага кўра, машғулотлар давомида дастлаб асосий таркибда Нико Пас ҳаракат қилган, кейинчалик эса унинг ўрнини "Интер Майами" ҳужумчиси Месси эгаллаган. Шунингдек, Скалони синов тариқасида Ҳулиан Альваресни Лаутаро Мартинес ўрнига майдонга туширган.
⠀
Маълум қилинишича, мураббий одатда икки нафар марказий ҳужумчи билан ўйнамайди. Бироқ машғулотнинг бир қисмида Лаутаро Мартинес ва Ҳулиан Альварес биргаликда ҳужум чизиғида ҳаракат қилган. Бунинг учун ярим ҳимоячи Эксекиель Паласиос таркибдан чиқарилган.
⠀
Кутилишича, Лаутаро Мартинес ва Ҳулиан Альварес Иорданияга қарши баҳсни асосий таркибда бошлаши мумкин. Дарвозани эса жамоанинг асосий посбони Эмилиано Мартинес қўриқлайди.