Мендеш “Сити” юлдузи хизматини “Реал”га таклиф қилди

“Манчестер Сити” ярим ҳимоячиси Бернарду Силванинг манфаатларини ҳимоя қилувчи агент Жорже Мендеш 31 ёшли футболчини Мадриднинг “Реал” клубига таклиф қилди.

Аввалроқ футболчи мавсум якунида инглиз клубини тарк этишини маълум қилган эди. Бу ҳақда AS нашри хабар берди.

Манба маълумотига кўра, ҳозирги вақтда испан гранди Англия чемпионини олти марта қўлга киритган футболчи хизматларига қизиқиш билдирмаяпти. Таъкидланишича, Бернардунинг ўзи фаолиятини топ-клубда давом эттиришни истамоқда.

Жорий мавсумда ярим ҳимоячи барча мусобақаларда 46 та ўйинда иштирок этиб, 3 та гол ва 5 та голли узатма амалга оширган.

Transfermarkt портали маълумотига кўра, футболчининг бозор қиймати 27 миллион еврони ташкил қилади.