Мбаппени “Ливерпуль”га жойламоқчи бўлишди

Испаниянинг «Реал Мадрид» клуби ҳужумчиси Килиан Мбаппе 2017 йилда «Ливерпуль»га ўтишга яқин келганини тасдиқлади.

Ўтган ёзда «Ливерпуль»нинг собиқ бош мураббийи Юрген Клопп Мбаппе билан самолёт бортида махфий музокаралар олиб борганини эслаган эди.

Мбаппенинг айтишича, «Ливерпуль» ҳақиқатан ҳам уни қизиқтирган, айниқса унинг онасини. Шунга қарамай, Килиан «Монако»дан ПСЖга ўтишни афзал кўрган.

«Мен қарор қабул қилишим керак эди. Ҳа, мен “Ливерпуль”га ўтишга яқин эдим. Онам Юрген Клоппнинг катта мухлиси эди ва у учун энг маъқул йўналиш “Ливерпуль” бўлган. У менинг ўша ерга ўтишимни хоҳлаган.

У биринчи қадамни ўзи ташлаб, музокаралар учун ўша ерга борди. Шаҳарни, стадионни кўрди, одамлар билан учрашди. Шундан кейин у: “Бу ажойиб клуб, ҳамма жуда меҳрибон, бу оилавий клуб, буюк клуб”, деди.

У “Энфилд”га бориб, унга ошиқ бўлди. Мен ўша стадионда ўзимни тасаввур қилишим учун у бир ўзи бир нечта ўйинга бориб, муҳитни ҳис қилди.

Эсимда, биз самолётда эдик, у (Клопп) ўз лойиҳасини тушунтираётганда самолёт осмонда айланиб учарди. Мен: “Мени кўндиришингиз шарт эмас. Сиз Юрген Клоппсиз, бу — “Ливерпуль”, буюк клуб. Мен бу ерда эканман, демак, менда қизиқиш бор. Аммо менинг бошқа вариантларим, бошқа лойиҳаларим ҳам бор ва улар ҳам яхши”, дедим.

Бу кулгили ҳикоя. Аммо охир-оқибат ПСЖга ўтишга қарор қилдим, чунки мен Парижда туғилиб, ўсганман. Ўзим туғилиб ўсган шаҳримда юлдузга айлана олишимни кўрсатишдан яхшироқ ҳис бўлмаган», — деди Мбаппе The Athletic нашрига.