Мбаппе — Дембеле дуэти жаҳон чемпионатлари рекордини янгилади

Статистик маълумотларга ихтисослашган Squawka портали хабар беришича, Франция терма жамоаси ҳужумчилари дуэти — Килиан Мбаппе ва Усман Дембеле жаҳон чемпионатлари тарихидаги 60 йиллик рекордни янгилади.

Маълумотга кўра, бу натижа ҳозирда давом этаётган 2026 йилги жаҳон чемпионати 1/16 финал босқичидаги Франция — Швеция учрашувида қайд этилди. Ушбу ўйинда Мбаппе Дембеле берган узатмадан сўнг рақиб дарвозасини ишғол этди. Шу тариқа, уларнинг жаҳон чемпионатларида биргаликда урган гўллар сони олтитага етди.

Бу кўрсаткич 1966 йилдан бери қайд этиб келинаётган статистикада энг яхши натижа ҳисобланади. Илгари энг юқори кўрсаткич сифатида биргаликда бештадан гол урган жуфтликлар қайд этилган эди: Польша терма жамоасидан Анджей Шармах ва Гжегож Лято, шунингдек, Германия термасидан Мирослав Клозе ва Михаэль Баллак.

Жорий жаҳон чемпионати доирасида Мбаппе умумий ҳисобда олти бор рақиб дарвозасини ишғол этган бўлса, Дембеле тўртта гол муаллифига айланган.