"Машъал" устози: "Очиғи, мураббийлик фаолиятимда бундай ҳолатга биринчи марта дуч келяпман"

Ўзбекистон Кубоги гуруҳ босқичидан ўрин олган "Машъал" - "Сўғдиёна" (1:2) учрашувидан сўнг мезбонлар устози Илдар Сакаев фикрларини билдирди. Бу ҳақида клуб матбуот хизмати маълум қилди.

- Нима ҳам дейиш мумкин? Вазиятлардан самара чиқара олаётганимиз йўқ. Бизга эса тушунарсиз голлар кириб кетди. Очиғи, мураббийлик фаолиятимда бундай ҳолатга биринчи маротаба дуч келяпман. Ишонсангиз ўйиндан олдинги кўрсатма 10 дақиқа бўлди. Йигитларга биз уйда, мухлисларимиз қаршисида ўйнаяпмиз, мана таркиб, улар учун ўйнанг дедим. Ҳаракат қилдик, лекин етарли бўлмади. Футболчилар ишончни йўқотиб қўйишган. Барчалари ёш бола эмас, катта футболчи. Ҳамма гап руҳиятда қолмоқда",- дейди Илдар Сакаев.

- Ҳумоюн Муртозаевнинг жисмоний ҳолати бугунги ўйинга тайёр эмасдек кўринди...

- Ҳумоюн астойдил ҳаракат қилди. У катта ҳажмдаги ишни бажаряпти. Фақат гол уриш керак. Ғалаба орқали қолган ишлар ҳам ўнгланади. Ишонч қайтади. Яна қайтараман: руҳият борасида муаммолар бор. Эртага раҳбарият билан бу вазиятдан қандай чиқиб кетиш масаласини гаплашиб оламиз. Кураш охиригача давом этади. Муборакда футболни яхши кўришади, шунинг учун бугун мухлислар ташриф буюришди.