Манчестерга чемпион мураббий келади

Майкл Кэррик “Манчестер Юнайтед”ни яхши бошқараётган бўлса-да, клуб раҳбарияти ёзда унинг ўрнига тажрибалироқ мутахассисни олиб келмоқчи.

Манчестерликлар янги бош мураббий лавозимига Роберто Мартинесни тайинлаш вариантини кўриб чиқмоқда. Испаниялик мутахассис жамоани бошқариш учун асосий номзодлар рўйхатига киритилган.

Роберто Мартинес ёзда Португалия терма жамоаси бош мураббийи лавозимини тарк этиши кутилмоқда. Бу ҳақда журналист Бен Жейкобс The United Stand аккаунти учун X ижтимоий тармоғида хабар берди.

52 ёшли мутахассис 2023 йилнинг январидан буён Португалия миллий жамоасини бошқариб келмоқда. Мартинеснинг амалдаги меҳнат шартномаси 2026 йил июл ойи охиригача мўлжалланган. Унинг раҳбарлигида Португалия терма жамоаси 2025 йилда Миллатлар лигасида ғолиб бўлган.

Ҳозирги кунда “Манчестер Юнайтед”ни бошқараётган Майкл Кэррикнинг шартномаси 2026 йил ёзигача амал қилади.