“Манчестер Сити”нинг молиявий найрангларидан энг кўп зарар кўрган клуб номи маълум бўлди

«Тоттенхэм» клуби «Манчестер Сити»нинг молиявий қоидабузарликларидан энг кўп зарар кўргани маълум бўлди.

Эслатиб ўтамиз, Англия Премьер-лигасининг мустақил комиссияси «Манчестер Сити»ни 2009–2018 йиллар давомида содир этилган молиявий қоидабузарликлар бўйича қўйилган барча айбловлар бандлари юзасидан айбдор деб топган.

Ушбу даврда «Манчестер Сити»дан ташқари яна 35 та жамоа Премьер-лигада иштирок этган. «Шаҳарликлар»нинг қоидабузарликлари туфайли айрим клублар чемпионлик унвонлари, кубоклар, Европа мусобақаларига йўлланмалар ва мукофот пулларидан маҳрум бўлган, баъзилари эса ҳатто Премьер-лигадан тушиб кетган.

BBC ҳар бир клуб кўрган зарарни пул қийматида баҳолаб, энг кўп зарар «Тоттенхэм»га етган, деган хулосага келди. Лондон клуби қоидабузарликлар содир этилган саккиз мавсумнинг тўрттасида Чемпионлар лигаси йўлланмаси бериладиган ўриндан атиги бир поғона пастда қолган.

«Тоттенхэм» кўрган зарар 119,9 миллион фунт стерлингга баҳоланган. Иккинчи ўринда Премьер-лигадан икки марта тушиб кетган «Ҳалл Сити» жойлашган — унинг зарари 99 миллион фунтни ташкил этган.

Учинчи ўринда «Эвертон» қайд этилган. Ливерпуль клуби 2013/14 йилги мавсумда Чемпионлар лигасида иштирок этиш имкониятидан, яна тўрт марта эса Европа лигаси йўлланмасидан маҳрум бўлган. «Эвертон»га етказилган зарар 66,4 миллион фунт стерлинг деб баҳоланган.

«Манчестер Сити»нинг қоидабузарликлари туфайли бошқа клублар кўрган умумий зарар 844 миллион фунт стерлингга баҳоланмоқда.