“Манчестер Сити” “Реал” президентлигига номзод Энрике Рикельмени судга бермоқчи

"Манчестер Сити" ҳужумчиси Эрлинг Холанднинг "Реал Мадрид"га ўтиши эҳтимоли атрофида жанжал кўтарилди. "Манчестер Сити" раҳбарияти Мадрид клуби президентлигига номзод Энрике Рикельмени судга бериш масаласини кўриб чиқмоқда.

Инсайдер Фабрицио Романонинг хабар беришича, инглиз клуби Холанднинг исми ва сурати сайловолди кампанияси доирасида ишлатилишидан норози.

Аввалроқ Рикельме сайловда ғалаба қозонган тақдирда норвегиялик ҳужумчини ўз сафига қўшиб олмоқчи эканини маълум қилганди. Унинг Холандда шартномани сотиб олиш банди борлиги ва футболчининг ўзи Мадрид клубига ўтишни хоҳлаётгани ҳақидаги баёноти алоҳида шов-шувга сабаб бўлди.

Клуб ва Холанд вакиллари аллақачон "Реал" билан қандайдир келишувлар мавжудлигини рад этган. "Манчестер Сити" ўз ва футболчи манфаатларини ҳимоя қилишнинг ҳуқуқий механизмларини ўрганмоқда. Мавзу яқин кунларда давом этиши мумкин.