“Манчестер Сити” футболчисини Испанияга юборадиган бўлди
- 24-декабр 2025, 09:03
- Zohir Toshxo’jayev
- 0
- Футбол
Англия Премьер-лигасида чемпионлик учун курашаётган “Манчестер Сити” мавсум бошида асосий таркибга кира олмаган иқтидорли ёш ўйинчи Клаудио Эчеверрини яна ижарага жўнатадиган бўлди.
Аргентиналик ўйинчи мавсумнинг биринчи ярмини ижара асосида Германия чемпионатида “Байер” таркибида ўтказди. Леверкузен жамоасида Эчеверри 11 та учрашувда иштирок этиб, битта голли пас узатди.
“Байер” раҳбарияти 31 декабргача мўлжалланган ижара шартномасини узайтиришни истамади ва футболчини Манчестерга қайтариб юборди.
Журналист Сесар Луис Мерлонинг маълум қилишича, “Манчестер Сити” раҳбарияти Клаудиони мавсум охирига қадар Испания чемпионатида иштирок этаётган “Жирона”га юборадиган бўлди. Испан клуби мавсум олдидан “шаҳарликлар”нинг бошқа ўйинчиси – Витор Рейсни ҳам ижарага олганди.
“Манчестер Сити” Эчеверрини 2024 йилнинг январида Аргентинанинг “Ривер Плейт” клубидан 18,5 млн еврога сотиб олган ва ўтган мавсум якунигача ўз клубида қолдирган эди.