"Манчестер Сити" футболчисига АПЛ ва Испаниядан қизиқиш бор

"Манчестер Сити" иқтидори Оскар Бобб қишки трансфер ойнасида жамоани тарк этиши мумкин. "talkSPORT" хабарига кўра, норвегиялик ҳужумчига Англия Премьер-лигасидан "Фулхэм" ва "Кристал Пэлас" қизиқиш билдирмоқда. Шу билан бирга, Боббни Англиядан ташқаридаги клублар ҳам кузатмоқда, улар орасида "Севилья" ҳам бор.

Маълум қилинишича, Боббнинг кетиши "Манчестер Сити" "Борнмут" футболчиси Антуан Семеньони трансфер қилган тақдирдагина мумкин бўлади. Манбаларга кўра, Семеньо "шаҳарликлар"га ўтишни истамоқда, унинг товон пули 60–65 миллион фунт оралиғида. Бу сумма қишки трансфер ойнасининг илк ўн куни ичида тўланиши шарт.

Оскар Бобб "Сити"ни ижара асосида ёки тўлиқ тарк этиши мумкин. Агар у бутунлай кетадиган бўлса, бу ҳолат 2019 йил июлида "Волеренга"дан келган футболчининг Манчестердаги олти йиллик фаолиятига якун ясайди.

22 ёшли ҳужумчи асосий жамоада илк ўйинини 2023 йил сентябрида ўтказган. Шу вақтга қадар у "Манчестер Сити" сафида жами 47 та учрашувда майдонга тушган. Клуб ва футболчининг ўзи бу кўрсаткич анча юқори бўлишини кутган, аммо 2024/25 мавсуми арафасида олган оғир жароҳати режаларни барбод қилди.

Бобб оёқ суяги сингани сабабли узоқ муддат майдондан четда қолди ва фақат 2 апрель куни "Лестер"га қарши ўйинда захирадан тушиб, майдонга қайтди. Ўша баҳсда "шаҳарликлар" 2:0 ҳисобида ғалаба қозонган.