Макгрегор Шимолий Ирландиядаги ҳужумдан сўнг иммиграцияни зудлик билан тақиқлашга чақирди

8 июнь куни кечқурун Шимолий Белфаст кўчаларидан бирида эркак маҳаллий аҳолига пичоқ билан ҳужум қилди. Гумонланувчи уч йил олдин Дублиндан Белфастга келган суданлик 30 ёшли бошпана изловчидир. У қотилликка суиқасд қилишда айбланмоқда. Жабрланувчи оғир аҳволда шифохонада ётибди. Шундан сўнг, 9 июнь куни Белфастда тартибсизликлар бошланди: юзлаб ниқобли одамлар муҳожирларга тегишли уйлар, автомобиллар ва дўконларга ўт қўйди.

Икки вазн тоифасида UFC собиқ чемпиони Конор Макгрегор Шимолий Ирландиянинг Белфаст шаҳрида пичоқ билан қилинган ҳужумдан сўнг "учинчи дунё мамлакатлари"дан иммиграцияни зудлик билан тўхтатишга чақирди.

"Учинчи дунё давлатларидан иммиграцияни зудлик билан тақиқлаш керак. Уларга қаерда бўлсалар ёрдам беринг. Биз буни кўп йиллар давомида гўзал ва олижаноб тарзда қилганмиз. Улар энди бу ерга кела олмайди", - деб ёзди Макгрегор Х ижтимоий тармоғида.