"Маглубият ҳам кўп нарсани ўргатади" - Илёс Зейтуллаев "Динамо"дан учралган мағлубиятни изоҳлади

"Бунёдкор" бош мураббий Илёс Зейтуллаев "Динамо"га қарши мағлубиятдан сўнг матбуот анжуманида иштирок этиб, ўз фикрини билдириб ўтди.

"Аввало, “Динамо Самарқанд”ни ғалаба билан табриклайман. Шу билан бирга, ўз жамоамга ҳам раҳмат айтмоқчиман. Чунки агар мен бугунги ўйинни мухлис сифатида стадионда кўрганимда, ўйиндан қониққан ҳолда уйга қайтардим деб ўйлайман. Шунинг учун айта оламанки, чемпионатимиз ўсиб бормоқда. Айниқса, иккинчи бўлим жуда қизиқарли ўтди, лекин биринчи бўлим ҳам томошабоп бўлди.

Баъзан мағлубият ҳам кўп нарсани ўргатади. У айрим муаммоларни очиб беради, баъзан эса биз эътибор бермайдиган жиҳатларни кўрсатиб қўяди. Бу масалаларни албатта таҳлил қилиб чиқамиз.

Биринчи бўлимдаги ўйин учун жавобгарликни ўз зиммамга оламан. Бу тактик жиҳатдан менинг хатом бўлди. Жамоани рақибга қарши нотўғри жойлаштирган эканман. Биз рақиб қанотларни тез-тез алмаштиришини, бирга-бир вазиятларда кучли эканини билардик. Шунинг учун танаффусдан кейин айрим ўзгартишлар киритдик ва иккинчи бўлимда ўйин анча ўзгарди.

Биринчи бўлимда жамоамиз етарлича агрессив ва интенсив ҳаракат қилмади. Рақиб биздан анча сергакроқ эди. Улар прессинг орқали таянч ярим ҳимоячимизга босим ўтказди ва у кўп ҳолатларда орқаси билан ўйнашга мажбур бўлди. Шу сабабли хатолар ҳам кўпайди. Биз ўйинни ўқиш борасида яна ўсишимиз керак.

Албатта, мулоқот масаласи ҳам бор. Бу фақат ўйин орқали яхшиланади. Жорий мавсумда жамоамизга кўп янги футболчилар келган, шунинг учун ўзаро тушунишни янада мустаҳкамлаш керак. Аммо бу баҳона эмас, бу устида ишлаймиз.

Афсуски, Шаҳбоз ўйин олдидан машғулотда орқа сон мушагини торттириб олди. Бу биз учун катта йўқотиш, чунки у жамоа учун жуда муҳим футболчи. У жуда позитив йигит ва ишга муносабати ҳам менга жуда ёқади. Унда катта салоҳият бор ва менимча у ҳали ўз имкониятининг ярмини ҳам кўрсатгани йўқ. Унинг тезроқ сафга қайтишини интиқлик билан кутяпмиз.

Жамоамиз таркиби унчалик кенг эмас, кўп ёш футболчилар бор. Шунинг учун тажрибали ва сифатли ўйинчилар биз учун жуда муҳим. У қайтса, жамоага катта ёрдам беради деб ўйлайман.

Азизбек Амонов ҳақида ҳам фикр билдирмоқчиман. У жуда яхши йигит ва ҳақиқий профессионал. Бизга келганида жамоага ёрдам беришни жуда истаган. Машғулотларда ҳам кўп ишлаган. Кейин у бошқа жамоага ўтди ва у ерда ўзини яхши томондан кўрсата олди. Бу футболда оддий ҳолат. Биз унинг яхши ўйин кўрсатишини ва яна миллий жамоага қайтишини тилаймиз.

Яқинда бошқа мураббийлар штаби машғулотимизни кузатиш учун келди. Улар билан чемпионатимиз, маданий жиҳатлар ва айрим муаммолар ҳақида суҳбатлашдик. Бу менинг у билан биринчи учрашувим эди, лекин унинг штабидаги мутахассислар билан алоқа бор".