Мадридликлар икки машҳур ўйинчини ижарага бериб юборди

Мадриднинг “Атлетико” клуби расмий сайти орқали асосий жамоанинг икки етакчи футболчисини ижарага берганини эълон қилди.

“Матрасчилар” матбуот хизмати жамоанинг учинчи сардори – уругвайлик ҳимоячи Хосе Мария Хименес Испаниянинг бошқа клуби – “Депортиво”га (Ла-Корунья) бир йиллик ижара асосида, кейинчалик сотиб олиш опцияси билан ўтганини билдирди.

Франциялик ҳужумкор ярим ҳимоячи Тома Лемар эса “Эльче”га бир йилга, сотиб олиш имкониятисиз ижарага берилди.

Хименес 31 ёшда. У 2013 йилда Уругвайнинг “Данубио” клубидан “Атлетико”га ўтган ва шу йили Диего Симеоне қўл остида жамоа таркибида дебют қилган.

Уругвайлик футболчи “матрасчилар” сафида жами 384 та ўйин ўтказган ва 14 та гол, 13 та голли узатма қайд этган. У Коке ва Ян Облакдан кейин мадридликлар жамоасининг учинчи капитани бўлган.

Лемар 30 ёшда. Франциялик футболчи саккиз йил аввал “Монако”дан “Атлетико”га 72 миллион евро эвазига ўтган ва ўша пайтда клуб тарихидаги трансфер рекордини ўрнатган.

Тома Лемар ўтган мавсумни “Жирона”да ижара асосида ўтказган. У “Атлетико” сафида жами 186 та учрашувда майдонга тушиб, 10 та гол урган ва 19 та голли узатма амалга оширган.