Лукаку Туркия Суперлигасига йўл олиши мумкин

"Наполи" ҳужумчиси Ромелу Лукаку клубни тарк этиши мумкин. Бу ҳақда Италия матбуоти хабар бермоқда.

Манбага кўра, бельгиялик футболчи клуб раҳбарияти билан келишмовчиликка учраган. Шу сабабли унинг келажаги ноаниқ бўлиб қолмоқда. Лукакуга Туркиянинг "Фенербахче" клуби қизиқиш билдирмоқда. Қайд этилишича, жамоа бош мураббийи Доменико Тедеско футболчи билан аввал Бельгия терма жамоасида бирга ишлаган.

Шу билан бирга, форвард ҳозирча қарор қабул қилишга шошилмаяпти. У вазият ёмонлашмаса, Италияда қолишни афзал кўрмоқда. Аввалроқ неополликлар раҳбарияти футболчини рухсатсиз Бельгияда мустақил равишда машғулот ўтказгани учун асосий таркибдан четлатиш билан таҳдид қилгани хабар қилинган эди.

Маълумот учун, жорий мавсумда 32 ёшли  ҳужумчи 7 та ўйинда майдонга тушиб, 1 та гол урган.