Лука Модрич: "Милан"ни Европанинг энг юқори поғонасига қайтаришни хоҳлаяпман"

37 ёшли Лука Модрич Италиянинг энг машҳур клубларидан бири — "Милан"га ўтишининг сабабларини очиқлади. Унинг таъкидлашича, у осон йўлни эмас, катта рақобат мавжуд бўлган жамоани танлаган.

"Мен бошқа рақобат камроқ бўлган лигани танлашим мумкин эди. Лекин бу менинг характеримга мос эмас. Мен ҳар доим қийин йўлни танлайман, шу сабаб "Милан"ни танладим. Бу ерда катта рақобат, юқори талаблар бор. Анчелотти менга "Милан" ҳақида фақат ижобий фикрлар айтди".

Унинг айтишича, асосий мақсади — юқори даражада ўйнашни давом эттириш ва 2026 йилги Америкада бўлиб ўтадиган Жаҳон чемпионатига муносиб тайёргарлик кўришдир:

"Мен бу ерга ўйнаш учун келдим. Тайёргарлик кўришни бошлашим керак. Жамоа ва мураббийнинг талабларини тушуниш учун вақт керак бўлади. Ўз устимда ишлашда давом этаман".

Еврокубокларда иштирок этмаслик борасида эса шундай деди:

"Реал"дан кетишга тўғри келган бўлса, катта мақсадли жамоани танлашни хоҳладим. Ачинарлиси, "Милан" Европа майдонларида йўқ. Лекин бу мен учун ҳал қилувчи омил бўлмади. Ҳар ҳафта битта ўйин ўтказиш мумкин, бу эса тайёргарлик учун вақтни оширади".

13 йил "Реал"да ўйнаган хорватиялик футболчи "Милан"нинг ўтмишда қандай улкан клуб бўлганини ва уни яна шундай даражага қайтариш ниятида эканини айтди:

"Мен тарихдаги энг буюк клубда ўйнадим. Энди эса унинг энг яқинидаги клуб билан ман. "Милан" ўтмишда "Реал" қандай бўлса, худди шундай клуб эди. Менинг вазифам — жамоага бу мавсумда ёрдам бериш ва ўзим ҳам майдондан завқ олиш".

Модрич шунингдек, "Милан" бош мураббийи Массимилиано Аллегри билан учрашувни ҳам кутмоқда:

"2017 йилда Чемпионлар лигасида "Ювентус"ни мағлуб этганмиз. Бу унинг хотирасида жуда ёқимли бўлмаса керак. Лекин мен у билан ишлашни жуда ҳам хоҳлаяпман. Аллегри — дунёнинг энг яхши мураббийларидан бири", - дея катта интервью бериб ўтди "қироллик клуби"нинг собиқ футболчиси. 

 
Эслатиб ўтамиз, миланликлар А Сериядаги илк учрашувини 23 август куни Кремонезега қарши ўтказади.