Луис Энрике финалдан кейинги можарони изоҳлади

Клублар ўртасидаги Жаҳон чемпионати финалида "Челси" — ПСЖ (3:0) ўйинидан сўнг майдонда қизғин можаро юз берди. Учрашув якунида парижликлар бош мураббийи Луис Энрике ва "Челси" ҳужумчиси Жоао Педро ўртасида тортишув келиб чиқди.

Маълумотларга кўра, Энрике ўйинда учинчи голни урган Педрони тўсиб қолган ва унинг томонига қўлини узатган. Бу ҳаракат жараёнида мураббий дастлаб Педронинг бўйнига, сўнгра юзига уриб юборган. Ҳужумчи эса ерга йиқилган.

Воқеа юзасидан фикр билдирган Энрике шундай деди:

"Аввал у мени итарди, кейин мен унга тегдим, у эса йиқилди. 

Ўйиндан сўнг олдини олиш мумкин бўлган вазият юзага келди. Бундай ҳолларда доимо бўлганидек, муаммони янада чуқурлаштириб юбормаслик учун ўйинчиларни ажратишга ҳаракат қилдим. Вазиятнинг кескинлашиб кетмаслиги учун барчамиз бунинг олдини олишимиз керак эди.

Ўйин жуда кескин кечди, ҳамма катта босим остида эди. Мен Маресканинг ўйинчиларни туртаётганини, бошқаларнинг эса уни итараётганини кўрдим. Барчамиз бундай ҳолатлардан қочишимиз лозим, шунинг учун ҳам мен ўйинчиларни ажратиб қўйдим" - дея қисқа жавоб берди испаниялик мутахассис.

Финалдан сўнгги ушбу воқеа ижтимоий тармоқларда катта муҳокамаларга сабаб бўлди. Ташкилотчилар томонидан расмий баёнот ва эҳтимолий жазо чоралари ҳозирча эълон қилинмаган.