Луис Энрике “Барса” юлдузини ўзига оғдириб олмоқчи
- 7-октябр 2025, 06:57
- Zohir Toshxo’jayev
- 0
- Футбол
Европа Чемпионлар лигасининг амалдаги ғолиби “Пари Сен-Жермен” раҳбарияти жамоа таркибини мустаҳкамлаш учун янги ижрочилар трансферига алоҳида эътибор қаратиб келмоқда.
Sport.es нашрининг ёзишича, парижликлар “Барселона” ҳимоячиси Эрик Гарсия атрофидаги вазиятни кузатиб келмоқда. 24 ёшли футболчининг каталонияликлар билан тузган битими жорий мавсум охирида якунланади.
ПСЖ бош мураббийи Луис Энрике агар Эрик Гарсия январгача “Барселона” билан янги шартнома имзоламаса, уни ўз жамоасига олиб ўтишга ҳаракат қилади.
Сўнгги маълумотларга қараганда, Испания чемпиони ўз ҳимоячисига 2030 йилнинг ёзига давом этадиган келишув таклиф қилмоқчи. Бироқ Эрик Гарсия билан музокара жараёни чўзилиб кетгани кўпчиликда шубҳа уйғотмоқда.
Эрик Гарсиянинг ўзи Каталонияда қолишга мойиллик билдирган. Бироқ спорт директори Деку у билан келишувни тез орада янгиламаса, Гарсияга даъвогар клублар, хусусан, ПСЖ уни илиб кетиш имконига эга бўлади.
Таъкидлаш жоизки, Луис Энрике ҳимоячининг имкониятларини яхши билади. Эрик Гарсия Испания терма жамоасидаги дебютини айнан Луис Энрике қўл остида нишонлаган.