"Локомотив"нинг хорватиялик ҳужумчиси: "Жамоани яна асосий лигага қайтишида ёрдам бермоқчиман, мослашиш учун вақт керак" (интервью)

Ўзбекистонда мавсум якунига етган ва жамоалар янги мавсумга тайёргарлик кўриш режаларини ишлаб чиқмоқда. Шунингдек, айрим клубларни етакчи футболчилар тарк этмоқда.

Шу билан бир қаторда жамоалар ўз таркибига бир қанча футболчиларни қўшиб олмоқда. Жумладан, янги мавсумни Про-лигада бошлайдиган Тошкентнинг "Локомотив" клуби Сингапур клубидан хорватиялик ҳужумчи Шиме Жужулни ўз сафига қўшиб олди. 

SPORTS.uz сайти журналисти Шоҳрух Зоиров бу трансфер борасида футболчининг ўзи билан боғланишга қарор қилди. Шиме нима сабабдан айнан Ўзбекистонни танлагани, мамлакатимиз футболи борасида нималарни билиши ҳақида қуйидаги интервью орқали батафсил танишиб чиқишингиз мумкин. 

- Хайрли кун, Шиме! Биринчи савол одатий. Нима учун айнан Ўзбекистонни танладингиз?

- Сизга ҳам кун хайрли бўлсин! Менга Хорватиядаги агентлар "Локомотив"дан таклиф борлигини айтишди. Улар менга лига ва клуб ҳақида ажойиб маслаҳатлар беришди. Мен доим янгилик қилишдан қочмаганман. Шу сабабли таклифни кўп ўйлаб ўтирмадим. 

- Клубга ташриф буюришдан асосий мақсадингиз нима? 

- Мен "Локомотив"ни яна асосий лигага қайтишида ёрдам бермоқчиман. Кўп голлар уришни истайман, албатта. Қўлимдан келганча, ўзимнинг энг яхши ўйинимни намойиш этишга ҳаракат қиламан. 

- Бу ерга келишдан олдин Ўзбекистон ҳақида нималарни билардингиз?

- Очиғи, кўп нарса билмасдим. Бу ердаги футбол, табиат, одамлар билан ҳам энди танишаман. Умид қиламанки, бу ерга тезда кўникиб кетаман.

- Ўзбекистонда Хорватиядан кам футболчилар тўп тепади. Деярли йўқ, десак ҳам хато бўлмайди. Бу сизга ноқулайлик туғдирмайдими?

- Менга мослашиш учун вақт керак. Бу иложи борича кам вақт олади, деб ўйлайман. Клубга ва унинг мухлисларини хурсанд қилишга тайёрман ва бунинг учун боримни бераман. 

- "Локомотив"дан ташқари ҳам қандайдир таклифлар бўлдими?

- Ҳа, 2-3 та таклифлар бор эди. Аммо мен айнан шу жамоада ишончли лойиҳа борлигини кўрдим. Табиийки, танлов борасида кўп ҳам ўйланиб ўтирмадим. 

- Сиз учун қайси услубда тўп тепиш осонроқ?

- Мен тезкор ва вертикал футболни афзал кўраман. Масалан, Юрген Клоппнинг "Ливерпул"ига ўхшаш услубни маъқул кўраман. 

- Сизга битта футболчининг ўйини ёқади ва унинг исми...

- Марио Манжукич. Менга унинг ўйинларини кузатиш ёқарди. Унинг ҳар ўйиндаги ҳаракатларини қадрлаш керак. Марио - идеалимдаги ҳужумчи саналади.

 

Шоҳрух Зоиров суҳбатлашди.