"Локомотив" бош мураббийи: "Тўғриси, Яхшибоев билан боғлиқ вазият мен учун ҳам тушунарсиз"

Суперлиганинг 3-турида "Локомотив" "Қўқон-1912"га қарши майдонга тушди ва унда ҳисоб очилмади - 0:0. Ушбу беллашувдан сўнг "Локо" устози Мирко Еличич матбуот анжуманида қатнашди. 

- Ўйин яхши ўтди. Умуман олганда, тенг ўйин бўлди. Яхши ўйнадик, дея олмайман. Балки ўтган ўйин сабаблидир, бироз темпни йўқотдик. Ўшанда ёмон майдонда футбол ўйнамагандик. Балки бугунги об-ҳаво ҳам сабаб бўлгандир. Чунки бир қанча футболчиларимиз касал бўлиб қолишди. Совуқ ҳаво сабабли иккала жамоа футболчилари нафас олишга қийналишди. Айрим футболчиларимда ўйинга қадар ҳам бир қанча муаммолар бор эди. Шунда ҳам йигитларим ҳаракат қилишди. Уларга раҳмат айтаман. Деярли тенг ўйиннинг гувоҳи бўлдик.

- Учта ўйинда 7 очко олиш сизни қониқтирдими?

- Дастлабки икки ўйинда 6 очко олдик ва бугун 1 очко билан кифояландик. Албатта, биз ҳар бир ўйинда уч олишни мақсад қиламиз, лекин бу футбол ва бунда қийинчиликлар ҳам учраб туради. Бугун ютганимизда яхши бўларди, лекин дуранг қайд этдик. Бугун осон ўйин бўлмади, ҳар икки жамоа кураш олиб борди, шундан келиб чиқиб дуранг адолатли бўлди, деб айта оламан.

- Дастлабки турларда "Локомотив"ни кўп танқид қилишганди. Экспертлар илк уч турдаги рақиблар эса унчалик кучли эмас ва омади келиб, 7 очкони қўлга киритди, деб ҳисоблашди. Жамоанинг навбатдаги ўйини "Нефтчи"га қарши бўлади ва айнан ушбу учрашув жамоанинг кучини намоён қилиб беради, деган фикрга қандай қарайсиз?

- Ҳозир Суперлигадаги барча ўйин қийин ўтмоқда. Осон ўйиннинг ўзи йўқ. "Нефтчи"даги баҳс жуда қийин ўтади. Уларни таҳлил қилиб чиқамиз. Таркиби жуда кучли, 20 футболчи исталган бошқа жамоаларни кучайтириб юборади. Улардаги танлов имконияти катта. Биз эса ҳар бир ўйинга уч очко учун чиқяпмиз. Ҳеч кимдан қўрқмаймиз ва ҳимоявий ўйнамаймиз, футбол ўйнашга ҳаракат қиламиз. Баъзида бу ўхшамоқда, баъзида эса кутилгандек бўлмаяпти. Ушбу ўйин биз учун яхшигина синов бўлади.

- Таркибда ёш футболчиларнинг салоҳиятини очиб бераётганингиз учун раҳмат айтаман. Дастлабки уч турда иккита гол урган Қувончбек Абраевнинг ўйини ҳақида нималар дея оласиз?

- Қувонч ўзининг термадаги ўйинлари орқали ўтган йили кўпчиликнинг эътиборига тушди. Ҳозир у катта футболга кўникиши бироз қийин бўлмоқда. Ҳозир унда олдинга қадам ташлаётгани кўринмоқда. Катталар каби шуғулланяпти. Унда техника, тезлик бор. Энди унинг ўйинига бошқа сифатларни ҳам қўшиш керак. У уч ўйин орқали ўзига бўлган ишончни орттириб бормоқда ва бу яхши ҳолат. Фақатгина у эмас, балки, бошқа ёшларда ҳам шундай ҳолат.

- "Қўқон-1912" "Локомотив" учун ноқулай рақиб ҳисобланади. Сиз ноқулай рақиб иборасига қандай муносабатдасиз?

- "Қўқон-1912"ни яхши биламан. Улар барча рақибларга кураш таклиф қилишади ва футболчилар доимо жисмонан бақувват бўлишади. Улар ҳар доим охиригача кураш олиб боришади ва рақибларга осон ўйин кўрсатишига имкон бермайди. Бугун ҳам жамоалар кўпроқ курашишди. Ўтган ўйинда "Машъал"даги каби кураш олиб бордик. Бу томондан олиб қараганда, улар яхши футбол қуришмоқда. Бугун ҳам кўпроқ кураш ва камроқ футболни кўрдик.

- "Локомотив" Жасур Яхшибоев билан шартнома имзолади, клуб бу борада расман эълон ҳам қилди. Лекин у билан бошқа гап-сўзларни ҳам ўқидик. Аслида нималар содир бўлганди?

- Тўғриси, бу мен учун ҳам тушунарсиз. Буни кўпроқ раҳбариятдан сўраш керак. Барчаси унинг ўзига қолдирилганди. Биз уни таклиф қилдик ва у тайёр бўлганида бизга келиши керак эди. Кейинчалик яна музокаралар бўлди ва бунда аниқ бир нима бўлгани йўқ.

- Энди барчасини ёзгача кутиш керак бўладими?

- Балки ҳаммаси аниқ бўлиб улгургандир. Лекин мен учун барчаси ноаниқ ва мавҳум. Биз у учун ҳам вариантлар тайёрлагандик, шу билан бирга бошқа ҳолатга ҳам тайёр тургандик.