"Ливерпуль" ҳужумчиси де Брюйне ортидан "Наполи"га ўтиши мумкин

"Ливерпуль" вингери Федерико Кьеза Италия А Сериясига қайтиши мумкин. Бу ҳақда италиялик инсайдер Альфредо Педулла хабар берди. Манбага кўра, футболчига "Наполи" жиддий қизиқиш билдирмоқда.

27 ёшли италиялик вингер ўзининг мерсесайдликлар клубидаги ҳолатидан мамнун эмас ва фаолиятида янги босқични бошлашга тайёр. Бундан ташқари, неаполликлар Кьезани ҳозирги трансферлар ойнасида қўлга киритишни кўзламоқда. Маълумотларга кўра, жамоани ўтган мавсум чемпион қилган Антонио Конте ҳам бу трансферга қарши эмас.

Федерико ўтган мавсум "қизиллар" сафида 14 ўйинда иштирок этиб, 2 та гол ва 2 та голли узатма муаллифи бўлди. Унинг Transfermarkt порталидаги баҳоси эса 14 миллион еврога тенг бўлмоқда.

Маълумот учун, Кьеза аввалроқ "Фиорентина" ва "Ювентус"да тўп сурган, Италия терма жамоаси сафида ҳам бир қатор муҳим ўйинларда иштирок этишга муваффақ бўлган.