Левандовски "Севилья"га қарши ўйинда пенальтидан гол ура олмаганига изоҳ берди

"Барселона" ҳужумчиси Роберт Левандовски Ла Лиганинг 8-турида "Севилья"га (1:4) қарши ўйинда амалга оширилмаган пенальтидан сўнг ўз фикрларини билдирди.

"Бундай ўйинлар баъзан бўлиб туради. Бу футболнинг ажралмас бир қисми ҳисобланади. Ҳамма нарса сен кутгандек кечавермайди. Баъзан пенальтидан гол ура олмайсан, лекин бу ҳам ўйиндаги бир ҳолат. Шу каби вазиятлар бизга келгусида куч беради, деб ўйлайман.

Албатта, жуда афсусдаман. Аммо умид қиламанки, биз бу мағлубиятга тўғри муносабатда бўламиз ва қолган ўйинларда уни мотивация сифатида ишлатамиз. Омадсизликлар доим содир бўлади — ёки ютқазасан, ёки имкониятдан фойдаланолмайсан. Энг муҳими — тезроқ тикланиш, майдонга қайтиш ва янги синовларга тайёр эканингни исботлаш", — деди Левандовски "Meczyki" нашрига берган интервьюсида.

Маълумот учун, поляк ҳужумчиси жорий мавсумда Ла Лига доирасида 7 та ўйинда майдонга тушиб, 4 та гол урган.