Легионерларимизда биттадан ғалаба ва мағлубият!
- 9-феврал 2025, 22:23
- Zohir Toshxo’jayev
- 0
- Футбол
Озарбайжон юқори дивизионида икки нафар футболчимиз – Жасур Жалолиддинов ва Умарали Раҳмоналиев иштирок этмоқда.
22-турнинг энг қизиқарли учрашуви Россияда ишлаган икки тажрибали мураббий – Василий Березуцкий ва Қурбон Бердиев бошқараётган жамоалар ўртасида бўлди.
Березуцкий бош мураббийлик қилаётган “Сабаҳ” футболчилари “Турон-Товуз” жамоасига қарши ўтказилган беллашувнинг 15-дақиқасида ўз дарвозасидан тўп олиб чиққан бўлса-да, иккинчи бўлимда бир жуфт гол уриб, иродали ғалабага эришди.
Ғолиб жамоа сафида яқинда “Рубин”дан ижарага олинган ўзбекистонлик футболчи Умарали Раҳмоналиев тўлиқ ўйнади.
Жасур Жалолиддинов тўп тепаётган “Сумгайит” бу турда меҳмонда “Шамахи”га қарши тўп тепди. Учрашув мезбонларнинг кичик ҳисобдаги ғалабаси билан якунланди.
Ўзбекистонлик легионер 70 дақиқа ўйнаган бўлишига қарамай, “Сумгайит”ни мағлубиятдан қутқара олмади.
Қизиғи шундаки, легионерларимизнинг жамоалари мусобақа жадвалида ҳам кетма-кет жойлашган. 22 та учрашувда 31 очко жамғарган “Сабаҳ” бешинчи ўринда бораётган бўлса, “Сумгайит” 22 очко билан кейинги қаторда турибди.