Ла Лига: Бу юлдуз мавсумни “Барса”да якунлаши мумкин эмас!

Ла Лига раҳбари Хавьер Тебас Испания терма жамоаси ярим ҳимоячиси Даниэль Ольмо мавсумни “Барселона”да якунламаслиги кераклигини таъкидлади.

- Мен “Барселона” ўз муаммоларини ҳал қилиб олишини кутдим. Бунинг учун каталонияликларда августдан бошлаб, тўрт ой вақт бор эди. Ишлаш ва муаммо ечимини ҳал қилиш учун етарли вақт бор эди. Улар эса ҳаммасини жуда тез, уч кунда уддалашни истади.

3 январь куни “Барселона” биз сўраган тўловлар кафолатини берди. Лекин улар тақдим қилган компаниянинг тўловларни амалга оширишга қодирлиги шубҳа остида қолди. Улар Испания олий спорт кенгашига (CSD) мурожаат қилди. 24 соатдан кейин бу масалани ҳал қилгандек бўлишди. Бу айрим масалалар бўйича шубҳа туғдиряпти.

Ольмо ўтган йили ёзда “Барселона” билан шартнома тузаётганида декабрни у қайдномадан ўтказилмаслигини билган. Бу футболчи мавсумни “Барса” билан Ла Лигада якунламаслиги керак. Биз ўз талабларимизни аниқ келтирганмиз, - деди Хавьер Тебас.

Таъкидлаш жоизки, Испания олий спорт кенгаши (CSD) Ла Лига ва Испания Қироллиги футбол федерацияси қаршилигига қарамай, “Барселона”га Даниэль Ольмо ва Пау Викторни Ла Лига, Испания кубоги ва Суперкубоги учун рўйхатдан ўтказишга рухсат берди.

Ана энди бу масала ҳали ҳам тўлиқ ечимини топмаган бўлиб чиқмоқда.