Крикет бўйича "Мустақиллик кубоги": "ANFA" жамоаси чемпион

Ёзги Олимпия ўйинлари дастуридан ўрин олган крикет мамлакатимизда жадал ривожланаётган спорт турларидан бири ҳисобланади. Ўзбекистон Крикет федерацияси томонидан мазкур спорт турини оммалаштириш, унинг моддий-техник базасини мустаҳкамлаш, ёшлар ўртасида крикетга қизиқишни ошириш ҳамда иқтидорли спортчиларни эрта аниқлаш борасида изчил ишлар амалга оширилмоқда.

Жумладан, ёшлар ўртасида крикетни кенг тарғиб қилиш, истеъдодли спортчиларни саралаб олиш ва уларни клублар ҳамда миллий терма жамоалар таркибига жалб этишга алоҳида эътибор қаратилмоқда.

Ана шундай саъй-ҳаракатлар самараси ўлароқ, жорий йилнинг 12 сентябрь куни Тошкент вилоятининг Қибрай туманида жойлашган "ANFA" халқаро крикет стадионида Ўзбекистон Республикаси мустақиллигининг 35 йиллиги муносабати билан клублар ўртасида "Мустақиллик кубоги" турнири ташкил этилди.

Турнирда иштирок этган жамоалар кун давомида қизғин ва муросасиз беллашувларда ўзаро куч синашди. Мусобақанинг ҳал қилувчи баҳсида Тошкент шаҳрининг "ANFA" ҳамда "O‘zbekiston Stars" жамоалари финалда майдонга тушди.

Якуний натижаларга кўра, рақибидан устун келган "ANFA" жамоаси мусобақада биринчи ўринни эгаллаб, "Мустақиллик кубоги" соҳиби бўлди.

Турнир доирасида мусобақанинг тантанали очилиш маросими ҳамда ғолиб ва совриндорларни тақдирлаш тадбири ҳам ташкил этилди. Унда Ўзбекистон Крикет федерацияси раиси Азиз Михлиев иштирок этиб, мусобақа иштирокчиларини қутлади ва крикет спорт турини мамлакатимизда янада ривожлантириш борасида амалга оширилаётган ишлар хусусида фикр билдирди.

"Мустақиллик кубоги" турнири нафақат клублар ўртасидаги рақобатни кучайтириш, балки ёш ва иқтидорли крикетчиларни қўллаб-қувватлаш, уларнинг спорт маҳоратини ошириш ҳамда мамлакатимизда крикетнинг оммавийлигини янада юксалтиришга хизмат қилиши билан аҳамиятли бўлди.

Илҳом РАҲМОНОВ тайёрлади