Конте Италия терма жамоаси ҳақидаги гап-сўзларга ойдинлик киритди

"Наполи" бош мураббийи Антонио Конте Италия миллий терма жамоасини бошқаришга тайёр экани ҳақида тарқалган хабарларни рад этди.

Мутахассиснинг таъкидлашича, у бу борада ҳеч қандай баёнот бермаган ва ҳозирча бутун эътиборини клубдаги ишига қаратган.

"Мен бунга тайёрман, деб айтмадим. “Наполи” билан яна бир йиллик шартномам бор ва мавсум якунланганидан кейин президент билан суҳбатлашаман.

Сизлардан сўзларимни тўғри талқин қилишингизни қатъий сўрайман. Акс ҳолда, агар гапларим яна бузиб етказилса, умуман бошқа ҳеч нарса демайман", — деди Конте.

Аввалроқ Италия терма жамоасини тарк этган Женнаро Гаттузодан кейин Конте ушбу лавозимга асосий номзодлардан бири сифатида тилга олинаётганди.