Клоппнинг агенти "Реал" ҳақидаги хабарларга муносабат билдирди

Юрген Клоппнинг агенти Марк Косицке немис мутахассисининг "Реал Мадрид"ни бошқариши мумкинлиги ҳақидаги хабарларга изоҳ берди.

Аввалроқ "Реал" президентлигига номзод Энрике Рикельме Клоппни клуб бош мураббийи этиб тайинлаш истагини билдирган эди.

"У "Ливерпуль"ни яна чўққига олиб чиқди, “Боруссия”ни чемпион қилди ва ўзига хос услуб ҳамда характер қолдирди. Бу баъзан совринлардан ҳам муҳимроқ", — деган эди Рикельме.

Бироқ Клоппнинг вакили бу маълумотларни рад этди.

"Бу каби хабарлар жаҳлимни чиқаради. Юрген Клопп ҳозирги пайтда "Red Bull" тизимидаги вазифасидан мамнун ва клуб бош мураббийи сифатида ишлаш нияти йўқ.

“Реал” мавзуси унинг учун ҳозир ёпилган. Айниқса, мавжуд вазият ва атрофидаги омилларни ҳисобга олганда.

Келажакда уни қизиқтириши мумкин бўлган ягона вазифа — Германия терма жамоаси бош мураббийлиги", — деди Косицке "Sky Germany" нашрига берган интервьюсида.