Каземиро ўрнига 115 миллион евролик ўйинчи келади

Тобора ўзини ўнглаб бораётган “Манчестер Юнайтед” клуби тажрибали ярим ҳимоячи Каземиронинг ўрнига муносиб номзод қидиришда давом этмоқда.

Жамоада энг катта маош олаётган ўйинчилардан ҳисобланган бразииялик юлдузнинг амалдаги шартномаси 30 июнь куни тугайди ва у Манчестерни эркин агент мақомида тарк этади.

Журналист Майк Макгратнинг хабар беришича, Каземиронинг ўрнига олинадиган асосий номзодлардан бири сифатида “Ньюкасл” ярим ҳимоячиси Сандро Тонали кўрилмоқда. 25 ёшли футболчи Чемпионлар лигасида ўйнашни истайди, “Ньюкасл” эса жорий мавсум натижаларига кўра, катта эҳтимол билан мазкур мусобақага йўлланма ололмайди.

Италиялик футболчи муҳитни ўзгартириш вариантини жиддий кўриб чиқмоқда. Бироқ манчестерликлар учун асосий муаммо — трансфер қиймати бўлиб қолмоқда. “Ньюкасл” Тонали учун тахминан 100 миллион фунт стерлинг (115 миллион евро атрофида) маблағ  талаб қилади.