Катта баёнот: Роналду ҳамма нарсани очиб ташлади

Португалия терма жамоаси ҳужумчиси Криштиану Роналду миллий жамоадаги фаолияти якунланаётгани ҳақидаги миш-мишлар, шунингдек бош мураббий Жорже Жезус билан юзага келган можаро юзасидан батафсил изоҳ берди. Эслатиб ўтамиз, у айни шов-шувлар ортидан терма жамоа йиғинини тарк этган эди.

«Жорже Жезус билан содир бўлган воқеа ҳақиқат. Ваъда қилганимдек, миллий жамоанинг сўнгги йиғини атрофидаги барча ҳолатларни биринчи оғиздан, очиқ-ойдин тушунтиришни лозим топдим. 2026 йилги жаҳон чемпионатидан кейин португал халқига мўлжаллаб бир мактуб ёзганман. У ҳали ҳам менда сақланади. У ерда мен термани расман тарк этадиган кунимда айтишни истаган сўзларим ёзилган. АҚШдан қайтиб келаётганимизда Федерация президенти мендан қароримни қайта кўриб чиқишимни илтимос қилди, қаттиқ туриб олди. Чунки Федерация менинг қолишимни истарди», — дея бошлади сўзини Роналду.

Унинг сўзларига кўра, шу суҳбатдан сўнг Федерация раҳбари ундан ҳозирги бош мураббий номзоди ҳақида фикрини сўраган.

«Президент мендан ҳозирги бош мураббий номзоди бўйича фикримни сўради. Яна бошқа номзодлар ҳам борлигини айтди, лекин исмларини очиқламади. Менингча, бу тўғри танлов бўлишини айтдим. Шу боис янги мураббий тақдимотида чин дилдан хурсанд эдим. Натижалар ҳам бу қарор тўғри бўлганини кўрсатди», — деди у.

Роналду таъкидлашича, бир неча кун ўтиб, янги бош мураббий унга биринчи марта шахсан учрашишни таклиф қилган.

«Таклифни қабул қилдим ва учрашувни таътилларим охирига белгиладик. “Сидаде ду Футбол” стадионида кўришдик, ўша пайтда клубим шу ерда мавсумолди йиғин ўтказаётганди. Мураббий мендан жуда катта умид қилаётганини, унинг лойиҳасида менинг иштироким асосий аҳамиятга эга эканини айтди. Дарҳол менинг терма жамоадаги мавсум режасини тушунтирди: биринчи ва сўнгги ўйинларда майдонга тушишимни, жисмоний тайёргарлик сабаб ҳар ўйин олдидан уч-тўртта алмаштириш амалга оширилишини маълум қилди», — дейди Роналду.

Шу суҳбат давомида мураббий ҳужумчидан Норвегия ва Данияга сафарга бормаслик имкониятини кўриб чиқишни сўраган.

«У менга биринчи ўйинда майдонга тушиб, кейин Португалияда қолишим, “Драгау”даги ўйин олдидан жамоага қўшилишимни таклиф қилди. Мен бу таклифни дарҳол рад этдим. Мен учун буни қабул қилиб бўлмаслиги аниқ эди. Масала чет элда ўйнашим ёки ўйнамаслигимда эмасди, гап менинг терма жамоа сардори сифатидаги мақомимда эди. Португалияда қолиш каби “имтиёз” сардор учун тўғри намуна эмас. Охир-оқибат мураббий менинг фикримга қўшилди», — дея изоҳ берди у.

Роналду таъкидлашича, бу учрашувда «Ан-Наср» спорт директори Симау Коутиньо ҳам иштирок этган. У айни мураббийни 2025 йилда клубга келишига кўмаклашган шахс сифатида тилга олинди.

«Йиғин бошланишидан бир кун олдин мураббий Симау Коутиньо илтимоси билан яна бир суҳбат учун Лиссабондаги уйимга келди. Суҳбат тинч, осуда ўтди, август ойида келишилган барча тамойиллар ўз кучида қолди. “Алваладе”даги ўйинда майдонга тушдим, алмаштирилганимда ҳеч қандай муаммо чиқармадим. Сардорлик камарини шахсан Бруну Фернандешга топширдим. Ўша пайтда бу менинг терма жамоа сафидаги сўнгги қадамларим, сардор сифатидаги охирги ўйиним бўлишини тасаввур ҳам қилмаганман. Ўша куни мен учун фақат ғалаба муҳим эди. Ғалаба ҳар доим яхши, Португалия учун эса янада муҳим», — деди у.

Норвегиядаги ўйин куни тушлик пайтида эса вазият кескин ўзгарган.

«Жамоа билан бирга овқатланаётганимизда мураббий ёрдамчиси столимизга келиб, бош мураббий мен билан гаплашмоқчи эканини айтди. Мен учун кутилмаган ҳолат эди. Мураббий мендан 30 дақиқа ўйнашга тайёрмисан, деб сўради. Мен бутун эътиборимни тикланишга қаратган, жамоадошлар билан одатдагидек мулоқотда бўлган, бу куни майдонга тушмайман, деб ўйлаётгандим. Бунда ҳеч қандай муаммо йўқ эди. Бу сўров менинг тикланиш ва машғулот режамдан ташқари эди, чунки мен фақат 4-куни “Драгау”да ўйнашим керак эди. Лекин, албатта, розилик бердим. У “унда тайёр тур, 30 дақиқа ўйнайсан”, деди. Қолгани ҳаммага маълум: иккинчи бўлимданоқ қизишни бошладим, дақиқалар ўтиб борди, лекин майдонга туширилмадим. Мураббий менга берган сўзини бузди», — дея таъкидлади Роналду.

Унинг айтишича, ўйин тугагач, у фақат битта нарсани истаган — жамоа ғалаба қозониши ва ўзи ёлғиз қолиши.

«Ўйиндан кейин фақат ғалаба ва тинчликни истадим. Мухлисларни олқишлашга бормадим. Бу — менинг хатойим, бундай бўлмаслиги керак эди. Норвегияда бизга шунчалик катта қўллаб-қувватлов кўрсатган португалларга узр сўрайман. Шунингдек, португал бўлмаса-да, мени кўриш учун келган, аммо менинг ҳаракатларимдан ранжиши мумкин бўлган мухлислардан ҳам кечирим сўрайман», — деди у.

Роналдунинг сўзларига кўра, 48 соат ўтиб у, бош мураббий ва Симау Коутиньо иштирокида яна бир жиддий суҳбат бўлиб ўтган.

«Бу жуда очиқ, фильтрсиз суҳбат бўлди. Биз битта йўлга келишдик: мураббий менга ёлғиз айтган гапларини Симау Коутиньо ҳузурида, лекин бу сафар матбуот анжуманида такрорлаши керак эди. Оддий нарсага келишдик: у матбуот анжуманини шу мавзу билан бошлайди, барчасини ростини айтиб, масалани ёпишга ҳаракат қилади. У шундай дейиши керак эди: “Криштиану ҳеч қачон ўзи ўйнашни сўрамаган. Айнан мен, бошқа эмас, шу йиғин учун унга режа таклиф қилганман. Уни қизитиш учун юбориб, кейин майдонга туширмаганим хатолик бўлди. Агар яна шундай ҳолат бўлса, бундай қилмайман”. Суҳбат охирида мураббий мени қучоқлашимни сўради, матбуот анжуманида худди шу гапларни омма олдида айтишга ваъда берди. Масала шу билан ёпилади, мен Данияда ўйнамайман, “Драгау”да майдонга тушаман, деганмиз. Бу суҳбатда ҳам Симау Коутиньо ҳозир эди», — дея қайд этди у.

Роналдунинг таъкидлашича, мураббий илтимоси билан кейинчалик у, Симау Коутиньо ва Тьяго Кравейро иштирокида видеоконференция ўтказилган, унда келишувлар яккол шаклга келтирилган.

«Қисқа ҳужжат тайёрланди, уни ўзим кўриб чиқиб маъқулладим. У менинг розилигим билан мураббийга юборилди. Матбуот анжумани эса кутилганидек ўтмади: унинг хулқ-атвори биз учовимиз ўртасидаги суҳбатга мутлақо тўғри келмасди. Мен кутмаган тажовузкорликни эшитдим. “Мен истайман, мен қиламан, мен буюраман” деган кайфиятни кўрдим. У буни мен билан олдинги суҳбатларда ҳеч қачон, ҳатто яқиндан ҳам намоён қилмаган эди», — деди у.

Роналду матбуот анжуманида мураббий айтиши керак бўлган баёнот мазмунини ҳам келтирди:

«Мен қуйидагиларни тасдиқлашини кутган эдим:

1. Миллий жамоа билан шу мавсум учун режани Криштиану ўзи эмас, айнан мен таклиф қилганман. Бу узоқ ва жуда самарали суҳбат бўлган.

2. У терма жамоа билан қандай яшашини, миллий жамоани қай даражада севишини, дунёдаги нуфузини ва энг муҳими — 24 йил давомида терма жамоага кўрсатаётган ижобий таъсирини яхши биламан.

3. Мен таклиф қилган режа қабул қилинган.

4. У менинг қарорларимни ҳеч қачон шубҳа остига қўймаган. У намунавий, садоқатли ва профессионал бўлган.

5. Норвегиядаги ўйин менинг дастлабки режамга кирмаган. Бироқ биринчи ўйиндан сўнг унинг жисмоний жиҳатдан тикланганини ҳис қилдим ва эҳтимол, ундан фойдаланишим мумкинлигини олдиндан айтдим. Криштиану рози бўлди.

6. Пеле ёки Марадона даражасидаги ўйинчини қизитишга чиқариб, кейин майдонга туширмаслик менинг хатойим бўлди. Агар бугун бўлганида, бундай қилмаган бўлардим.

7. Хулоса қилиб айтганда: мен Криштиануни миллий жамоада кўришни истайман. Яхшики, у ҳам менга ишонади. У “Ан-Наср”да менга ишонган, бу ерда ҳам шундай.

8. Мухлисларни олқишламаслик масаласига келсак, бу ҳақда биз аллақачон гаплашганмиз. 230 дан ортиқ ўйин ўтказган футболчига Португалияни севиш бўйича дарс бериш менинг ишим эмас. Бу — ҳеч нарсани ўзгартирмайдиган бир дақиқалик ранжиш эди. У энг кўп автограф берадиган, энг кўп суратга тушадиган, мухлисларга энг кўп меҳр кўрсатадиган ўйинчи. Муаммо йўқ ердан муаммо қидирмайлик. Норозилик бўлса, одам реакция қилади. Шунинг ўзи», — деган мазмунда гапириши керак эди.

«Кўриб турибсизки, бу гапларнинг бирортаси у мендан узр сўраши керак эди, дегани эмас. Лекин у иккинчи бор менга берган сўзини бузди», — дея қўшимча қилди Роналду.

Шундан сўнг у терма жамоа йиғинини тарк этиш қарорини қабул қилган.

«Мен учун инсонлар ўртасидаги муносабатларда энг муҳим нарса — ростгўйлик. Қанча оғриқли бўлмасин, ростини айтиш керак. Матбуот анжумани куни тонгда Федерация президенти ва мураббий билан бўлган суҳбатда (улар буни тасдиқлай олишади) мен шундай дедим: агар улар мени терма жамоада кўришни истамаса, очиқ айтсин. Менга фақат ростини айтишлари кифоя эди», — дейди у.

«Иккаласи ҳам бир овоздан менинг жойим миллий жамоада эканини айтди. Деярли 25 йиллик фаолиятим давомида ҳеч қачон, ҳеч бир мураббий ёки терма жамоа раҳбарининг техник ёки тактик қарорларига аралашмаганман. Улар қандай қарор қабул қилса, яхши бўладими, ёмонми — қабул қиламан. Лекин сўз бузилса, мен у ерда ўзимни ортиқча ҳис қиламан. Терма жамоа йиғинини тарк этганим учун жамоадошларимдан ҳам узр сўрашим керак. Мураббийнинг сўзини бундай очиқ бузишига қарамай (буни суҳбатларда иштирок этганлар тасдиқлай олади), мен бу ишни қилмаслигим керак эди. Жавобгарлик фақат менинг зиммамда. Португал халқидан яна бир бор узр сўрайман, лекин мен учун сўзга хиёнат ҳал қилувчи аҳамиятга эга», — дея таъкидлади у.

Роналдунинг фикрича, шу пайтдан бошлаб унинг йиғинда қолиши жамоага фақат зарар келтириши мумкин эди.

«Шу туфайли мен ҳар доим ваъда қилган ишимни қилдим: ўзимни кераксиз ҳис қилган пайтимда жойимни бўшатишим керак. Шундай қилдим — жамодонимни йиғдим ва кетдим. Бу ҳаракатим оқибатларини Португалия футбол федерацияси баҳолайди ва жазо чорасини белгилайди. Мен тушунаман: бу ерда енгиллаштирувчи ҳолатлар бўлмаслиги мумкин. Мен оддий ўйинчи эмасман, жамоа сардориман, бу эса аксинча, оғирлаштирувчи омил. Мен аллақачон узр сўрадим, лекин ҳар қандай хатти-ҳаракатнинг оқибати бўлиши кераклигини биламан. Футбол билан боғлиқ ҳар қандай инсон яхши билади: ким бўлишидан қатъи назар, қоидалар ҳамма учун бир хил», — деди у.

Роналду шунингдек, эҳтимолий хайрлашув ўйинлари ҳақидаги гап-сўзларга ҳам муносабат билдирди.

«Кўп эшитдим: хайрлашув ўйини керак, мен муносиб тарзда хайрлашишим лозим, Федерация бу имкониятни бермоқчи, дейишади. Мен ҳаётимда кўп бор оч қолганман, ҳеч нарсага эга бўлмаганман ва бир нарсани тушуниб етганман: ҳеч ким ҳеч кимга ҳеч нарса бермайди. Барча мухлисларимга, айниқса португалларга шунни ваъда қиламан: бизда бир ёки бир нечта хайрлашув ўйини бўлади, бунга вақт келади. Лекин миллий жамоа ҳақида ўйласам, мен фақат расмий мусобақаларни кўз олдимга келтираман. Отам вафоти ҳақида хабар олган кунимда ҳам шу ҳақда ўйлаганман. Ўшанда мен терма жамоа йиғинида эдим ва эртаси куниги ўйин тугагунича жамоа билан қолишни танлаганман. Мамлакат учун шундай қарор қабул қилдимки, буни ҳеч бир клуб учун қилмаган бўлардим.

Шунинг учун, агар жисмоний ҳолатим яхши бўлса, клубимда ўйнасам, гол урсам, эҳтимол бўлиши мумкин бўлган дисквалификация муддати тугагач, бугунгача бўлгани каби, миллий жамоа шарафини ҳимоя қилиш ва ғалаба қозониш учун яна майдонга тушишга тайёр бўламан. Ишонинг, бу — мутлақ ҳақиқат», — дея сўзини якунлади Криштиану Роналду.