Каримов "Челси", "Реал", "Манчестер Сити" ва "Манчестер Юнайтед" клубларидан қизиқиш борлигини айтди

Ўзбекистон миллий терма жамоаси 2026 йилги Жаҳон чемпионатидаги иштирокини якунлаб, юртимизга қайтди. Мундиал давомида ўз ўйини билан мухлислар ва мутахассислар эътиборини қозонган Беҳруз Каримов келажаги борасидаги саволларга жавоб берди.

"Авваламбор, ассалому алайкум! Ҳар бир учрашув қийин бўлишини олдиндан билгандик. Мусобақа бошланишидан олдин жароҳат олганим сабабли кўпчилик менга ишонмади. Айримлар ёш ва тажрибасиз эканимни айтишди. Мен эса бунинг аксини исботлаш учун қўлимдан келган барча ишни қилдим. Бор кучим билан халқимизни хурсанд қилишга, уларнинг ишончини оқлашга ҳаракат қилдим.

Ҳозирда бир нечта клублардан таклифлар бор. Улар билан музокаралар олиб борамиз ва энг мақбул вариантни танлаймиз. Ёшлигимдан "Челси", "Реал Мадрид", "Манчестер Юнайтед" ва "Манчестер Сити" ўйинларини кузатиб келганман. Ҳозирда ушбу клублардан ҳам қизиқиш бор, аммо ҳозирча у ерга ўтишни режалаштирмаяпман. Мен учун энг муҳими — мунтазам ўйин амалиёти. Шу сабаб аввал ўртамийона жамоада ўзимни кўрсатиб, тажриба орттиришни, кейин эса гранд клубларга йўл олишни мақсад қилганман", — деди Каримов.