Каннаваро йирик мағлубиятнинг асл сабабини айтди

Ўзбекистон миллий жамоаси бош мураббийи Фабио Каннаваро жаҳон чемпионати гуруҳ босқичи иккинчи турида Португалияга қарши кечган ва мағлубият билан якунланган ўйиндан сўнг ўз фикрларини билдирди.

- Қисқа вақт ичида бир неча гол ўтказиб юборсангиз, ўйинни ўнглаш жуда қийинлашади. Биз сўнгги пайтларда олға силжаяпмиз, лекин бугун бешта гол ўтказиб юбориш – ҳаддан ташқари кўп. Энди барча эътиборни навбатдаги ўйинга қаратиш керак.

Ўйин бошида йигитлар қандай ҳаяжонга тушишини олдиндан билардим. Уларга яхши старт олиш қай даражада муҳимлигини тушунтиришга уриндим, аммо Португалияга қарши бундай қилиш осон эмас. Биз урган гол бекор қилингани жуда ачинарли, у бизга қўшимча руҳий куч бериши мумкин эди.

Даража борасида фарқ жуда катта, устига-устак, биз ҳам яна бир неча оддий хатоларга йўл қўйдик. Албатта, афсусланадиган жойи бор, лекин шу билан бирга жаҳон чемпионатидаги дастлабки икки ўйинни Колумбия ва Португалияга қарши ўтказдик – бу жамоалар дунёдаги энг кучли йигирма терма жамоа қаторига киради. Бу мен учун ҳам, йигитлар учун ҳам фантастик тажриба бўлди.

Декабр ойида Осиё кубоги бўлиб ўтади. У ерда янги нарсаларни намойиш этишга ҳаракат қиламиз – жаҳон чемпионатида иштирок этиш орқали қўлга киритган қадрият ва тажриба вазиятни тубдан ўзгартириши мумкин, – дея таъкидлади Фабио Каннаваро.