Каннаваро Португалияга қарши қандай ўйнаш ва энг муҳим жиҳатларни айтди

Жаҳон чемпионати доирасида Португалияга қарши ўйин олдидан Ўзбекистон терма жамоаси бош мураббийи Фабио Каннаваро ўз фикрлари билан ўртоқлашди. 

- Португалия билан ўйинда пас беришда хато қилиш жуда хавфли. Уларнинг тўпни қай даражада тез ҳаракатлантира олишини кўрганингизда, техник жиҳатдан қандай кучли эканини англайсиз. Мен фақат жисмоний ҳолатга қараб баҳолашни ёқтирмайман, чунки охир-оқибат барибир сифат ҳал қилади: тўпни назорат қилиш, аниқ пас, йўқотишлар сони. 

Агар биз бир ўйинда тўпни 20 марта йўқотсак, уни қайтариб олиш учун 20 марта ортга қайтиб югуришга тўғри келади. Бу жуда муҳим. 

Португалиянинг барча кўрсаткичлари бўйича статистикаси жуда юқори. Майдон бўйлаб шунчаки югуриш мумкин эмас. Қачон босим ўтказиш, қаерда тўпни тортиб олиш ва қандай қилиб ҳужумда хавфли бўлишни аниқ тушуниб олишимиз керак, — деди Фабио Каннаваро.

Унинг таъкидлашича, Португалия ёки бошқа етакчи терма жамоаларга қарши ўйинларда ҳар бир майда деталь ҳам ҳал қилувчи аҳамият касб этади.

- Албатта, Португалия каби терма жамоага қарши майдонга тушаётганда ҳамма нарсани инобатга олиш зарур. Энг кичик хатолар ҳам натижага таъсир қилиши мумкин. Колумбияга қарши ўйинда учта жиддий хатога йўл қўйдик, жуда оғир вазиятлар юзага келди. 

Ҳар бир ўйин ўзига хос — яхши паллалар ҳам, ёмон онлар ҳам бўлади. Лекин биз майдонда охиригача курашишимиз, ўйиндан узилмаслигимиз шарт. Хатолар сонини камайтиришимиз керак, шунда ўйинларнинг охирида натижадан мамнун бўлиш имконияти пайдо бўлади, — дея Каннаваронинг сўзларини Globo келтиради.

Жаҳон чемпионатида илк бор иштирок этаётган Ўзбекистон терма жамоаси икки турдан сўнг гуруҳ "K" жадвалида охирги ўринни эгаллаб турибди — ҳозирча очко йўқ. Уч очко тўплаган Колумбия пешқадамлик қилмоқда, бир очкога эга Конго иккинчи поғонада, Португалия эса бир очко билан учинчи ўринда жойлашган.