"Junior European Cup 2025" турнири. Мусобақанинг биринчи кунида 5 та медални қўлга киритдик

Венгриянинг Пакш шаҳри дзюдо бўйича ёшлар ўртасидаги Европа кубогига мезбонлик қилмоқда. 

Дунёнинг 5 қитъаси 38 давлатидан келган 500 нафарга яқин иштирокчи қатнашаётган "Paks Junior European Cup 2025" мусобақасида Камол Муродов ва Диёрбек Ўразбоев мураббийлигидаги Ўзбекистон ёшлар терма жамоаси аъзолари татамига чиқишяпти. 

Нуфузли мусобақанинг биринчи куни дзюдочиларимиз 1 та олтин, 2 та кумуш, 2 та бронза медалига эга чиқишди. -66 кг вазнда курашган Дилшодбек Ҳамроев "Paks Junior European Cup 2025" чемпионига айланди. У ўтган ҳафта Чехиянинг Прага шаҳрида ўтказилган Европа кубогида ҳам олтин медални қўлга киритганди. 

Финалга қадар мағлубияциз етиб келган Хуршида Раззоқбердиева (-70 кг) ва Умида Ниғматова (+78 кг) кумуш медал билан тақдирланишди. Асадбек Мисиров (-60 кг) ва Муҳриддин Маъруфов (-73 кг) бронза медалига сазовор бўлишди. 

Биринчи кунги беллашувлар натижасига кўра, Ўзбекистон терма жамоаси 32 давлат орасида 3-ўринни эгаллаб турибди. Мусобақада ИЖФ байроғи остида қатнашаётган дзюдочилар 3 та олтин, 3 та кумуш, 6 та бронза медали билан биринчи ўриндан жой олган. Исроил 2 та олтин, 2 та бронза медали билан 2-ўринни банд этган.

Ўзбекистон дзюдо федерацияси матбуот хизмати хабар бермоқда.