"ЖЧ-2026"да иккита янги қоида киритилиши кутилмоқда

Футболда ўйинчиларни оғзини ёпган ҳолда можароларда иштирок этгани учун майдондан четлатиш амалиёти жорий этилиши мумкин.

ФИФА Жаҳон чемпионатида қўлланилиши мумкин бўлган иккита янги қоида устида иш олиб бормоқда. The Times нашри маълумотига кўра, "ЖЧ-2026"да рақиб билан можаро вақтида оғзини қўли ёки кийими билан ёпган футболчилар қизил карточка билан жазоланиши мумкин.Шунингдек, ҳакам қарорига норозилик белгиси сифатида майдонни тарк этган ўйинчилар ҳам дарҳол майдондан четлатилиши режалаштирилмоқда.

Кутилишича, Жанни Инфантино ушбу ўзгаришларни 30 апрель, пайшанба куни Ванкуверда бўлиб ўтадиган ФИФА конгрессида эълон қилади. Ҳозирча ушбу қоидалар фақат "ЖЧ-2026" доирасида қўлланилиши режалаштирилган. Бошқа мусобақа ташкилотчилари эса янги тартиблар кутилмаган оқибатларга олиб келиши мумкинлигидан хавотирда. Масалан, футболчи ирқий ҳақоратлар сабаб майдонни тарк этса, бу ҳам жазога сабаб бўлиши мумкин.

Аввалроқ “Бенфика” вингери Жанлука Престианни Чемпионлар лигаси баҳсида “Реал” футболчиси Винисиусга нисбатан гомофоб ҳақоратлар қилгани учун 6 та ўйинга дисквалификация қилинган (шундан 3 таси шартли). Можаро вақтида у оғзини футболкаси билан ёпган.

Шунингдек, аввал Африка футбол конфедерацияси Марокаш апелляциясини қаноатлантириб, Африка кубоги финалида Сенегал терма жамоасига 0:3 ҳисобида техник мағлубият ёзган эди. Бунга пенальтидан кейин сенегаллик ўйинчиларнинг майдонни тарк этгани сабаб бўлган. Кейинчалик улар ушбу қарорни CAS орқали қайта кўриб чиқишга мурожаат қилган.