Жавоҳир Синдаров Ўзбекистон — АҚШ учрашувида Хикару Накамурани мағлуб этди

Ўзбекистон терма жамоаси Майами шаҳрида ўтаётган WR Chess Rapid & Blitz мусобақасидаги жамоавий баҳснинг илк кунидан сўнг АҚШ терма жамоасидан орқада қолмоқда.

Биринчи кун дастуридан жами тўртта жамоавий рапид учрашуви ўтказилди. АҚШ шахматчилари икки баҳсда ғалаба қозонди, битта учрашувда Ўзбекистон устун келди, яна бири дуранг билан якунланди.

Шу тариқа, жамоавий очколар бўйича америкаликлар 5:3 ҳисобида олдинда бормоқда, алоҳида доскаларда тўпланган очколар нисбати эса 8,5:7,5 фойдасига АҚШ жамоаси томонда.

Ўзбекистон терма жамоасининг энг фаол шахматчиларидан бири сифатида Жавоҳир Синдаров алоҳида таъкидланмоқда. У мусобақани Фабиано Каруанага қарши дуранг билан бошлади, шундан сўнг Хикару Накамурани мағлуб этди, Левон Аронянга ютқазди ва Леньер Домингес устидан ишончли ғалабага эришди. Жами ҳисобда Синдаров тўрт учрашувдан 2,5 очко жамғарди.

Терма жамоа таркибида энг юқори шахсий натижага Нодирбек Абдусатторов эришди — у тўрт партиядан уч очко тўплади. Абдусатторов Накамура ва Каруанага қарши дуранг ўйнади, Домингес ҳамда Уэсли Со устидан эса ғалаба қозонди.

Рапид бўйича жамоавий раундлар натижалари: 

Биринчи раунд: АҚШ — Ўзбекистон — 2,5:1,5. 

Иккинчи раунд: АҚШ — Ўзбекистон — 2:2. 

Учинчи раунд: АҚШ — Ўзбекистон — 2,5:1,5. 

Тўртинчи раунд: АҚШ — Ўзбекистон — 1,5:2,5.

Мусобақанинг иккинчи кунида жамоалар блиц йўналишида саккизта учрашув ўтказади. Ҳар бир жамоавий раунд ғолиби икки очкодан қўлга киритади, дуранг қайд этилган тақдирда рақибларга биттадан очко берилади.