Жавоҳир Синдаров Мухиддин Мадаминов ғалабасига муносабат билдирди

Ўзбекистонлик гроссмейстер Жавоҳир Синдаров Тошкентда ўтган UzChess Cup мусобақасида ғолиб чиққан Мухиддин Мадаминов ҳақида фикр билдирди, дея хабар бермоқда Sports.kz.
 

Синдаров ҳамюртининг сўнгги йиллардаги тезкор ўсишини алоҳида қайд этиб, унинг ҳаётидан қизиқарли бир тафсилотни ҳам эсга олди.
 

«У жуда кучли ўйнади. Ҳамманинг ўзига аён: Мухиддин партиянинг дебют босқичида қай даражада кучли эканига. У билан бирга ишлаганимиз ҳам унга ёрдам берган, деб ўйлайман. Лекин яна бир жуда қизиқ жиҳат бор: Мухиддин шахматни ўйнашни ўн ёшдан бошлаган. Бизда ҳатто шундай суратлар борки, мен аллақачон гроссмейстерман, у эса менинг мухлисим. Мен бир вақтнинг ўзида бир нечта рақибга қарши кўргазмали ўйин ўтказяпман, у эса томошабинлар орасида турибди», — дейди Синдаров.
 

Унинг таъкидлашича, бундай кеч бошланган карьера Мадаминовнинг ютуқларини янада ҳайратланарли қилади.
 

«Бу ҳақиқий мўъжиза. Мухиддин ўн ёшда шахматга кириб келган. Оддий ҳолатда, агар сен ўн беш ёшгача гроссмейстер бўлмасанг, сени алоҳида истеъдод сифатида кўришмайди. Лекин у жуда кўп меҳнат қилди, ўз қобилиятини очди ва ҳали ҳам мени ҳайратда қолдиришда давом этяпти. Одамлар ҳали-ҳануз унинг қай даражада кучли эканини тўлиқ англаб етгани йўқ», — дея қўшимча қилди у.
 

Эслатиб ўтамиз, Мухиддин Мадаминов Тошкентда ўтказилган нуфузли UzChess Cup турнирида 9 имкониятдан 5,5 очко тўплаб, биринчиликни қўлга киритди. Қўшимча кўрсаткичлар бўйича у ҳамюрти Шамсиддин Воҳидов ва россиялик гроссмейстер Ян Непомнящийни ортда қолдирди.